به‌رهه‌مێ جۆتيارێن شنگالێ د ده‌ستێ واندا مايه‌

ناڤه‌ندا نووچه‌يان – سه‌ما
رێڤه‌به‌رێ هۆبا چاندنا شنگال ڕادگه‌هينت، به‌رهه‌مێن چاندنێ هنده‌ ل ده‌ڤه‌را شنگالێ مشه‌بووينه ب ئه‌رزانى دئێنه‌ فرۆتن و د ده‌ستێ جۆتياران دا مايه.

ئێك شه‌مبوويێ، 29ـی حوزەیرانا 2025، شه‌ره‌ف نايف، ڕێڤه‌به‌رێ هۆبا چاندنێ ل قه‌زا شنگالێ بۆ سه‌ما ڕاگه‌هاند: ئيساله‌ هنده‌ك به‌رهه‌مێن چاندنێ، وه‌كو خه‌يار، باجان و شه‌به‌شان ب ڕێژه‌يه‌كا زۆر ژلايێ جۆتياران ڤه‌ هاتينه‌ چاندن و د بازاڕى دا مشه‌بووينه‌.

ئاشكراكر: نوكه‌ به‌رهه‌مێ جۆتياران يێ پڕه‌ ل بازاڕى دا، به‌ڵێ ب به‌هايه‌كێ ئه‌رزان دئێنه‌ فرۆتن و ڤێ يه‌كێ جۆتيار دڵگرانكرينه‌ و دخوازن ب به‌هايه‌كێ پتر به‌رهه‌مێ وان بچن، داكو به‌رده‌واميێ بده‌نه‌ كارێ خۆ.

شه‌ره‌ف نايف، ڕاگه‌هاند ژى: دماوێ چه‌ند ساڵێن بۆرى دا ژبه‌ر نه‌بوونا هاريكاريێ و كه‌لوپه‌لێن پێدڤى يێن چاندنيێ، پتريا جۆتياران ده‌ست ژ كارێ چاندنيێ به‌ردايه‌ و گه‌له‌ك جۆتيار ب تنێ بۆ ژيارا خۆ به‌رهه‌مى دچينن.

گۆتژى: داخوازێ ل لايه‌نێن په‌يوه‌نديدار دكه‌ين هاريكاريا جۆتيارێن ده‌ڤه‌رێ بكه‌ن، داكو كه‌د و زه‌حمه‌تا وان ب هه‌روه‌ نه‌چت.

شنگال ب ئێك ژ ده‌ڤه‌رێن گرنگ يێن چاندنيێ دئێته‌ ل قه‌له‌م دان، ب تايبه‌ت ب چاندنا تووتنێ يا بناڤده‌نگه‌، خه‌ڵكێ شنگالێ پتر پشت به‌ستنێ ل سه‌ر كارێ چاندنێ و ب خودانكرنا ته‌رش و ته‌واڵى دكه‌ن.