ناڤهندا نووچهیان – سهما
ميرێ ئێزديان و سهرۆك كۆمارێ عێراقێ ل بهغدا كۆمبوون و دانوستاندن ل سهر چهند ڕهوشا ئێزديان و شنگالێ كر.
لدووڤ ڕاگههاندنا جڤاتا ڕۆحانى يا بلند يا ئێزديان بهڵاڤكرييه، د چارچووڤێ سهرهدانێن خۆ دا بۆ بهغدايێ، دووشهمبوويێ، 15ـى كانوونا ئێكێ 2025، مير حازم تهحسين بهگ، ميرێ ئێزديان ل كوردستان، عێراقێ و جيهانێ، دگهڵدا د. خهلهف شنگالى، شێوهرمهندێ سهرۆكوهزيرێن عێراقێ بۆ كاروبارێن ئێزديان و دبلۆماسى و باڵيۆز برين سهعيد، سهرهدانا لهتيف ڕهشيد، سهرۆك كۆمارێ عێراقێ كر.
ههر ل دووڤ ڕاگههاندنا جڤاتا ڕۆحانى، د ديدارێ دا ميرێ ئێزديان ل گهڵ سهرۆك كۆمارى چهندين پرسێن گرێدايى ڕهوشا ئێزديان و شنگالێ ب تايبهت بهحسكرن.
ههروهسا د ديدارێ دا، سهرۆك كۆمارى پابهنديا تمام يا دهولهتا عێراقێ بۆ پاراستنا مافێن ههموو پێكهاتهيان دووپاتكر.
سهرۆك كۆمارێ عێراقێ دووپاتكر، پێدڤيه ههموو سهركردهيێن ئۆلى و جڤاكى دگهڵ سازيێن دهولهتێ هاريكار بن، بۆ چارهكرن و نههێلانا شوونوارێن دهردهسهريێن ب سهرێ ئێزديان دا هاتين ل سهر دهستێ ڕێكخراوا داعش يا تيرۆرستى.
ژبال خۆ ڤه، ميرێ ئێزديان پهسنا گرنگيپێدانا سهرۆك كۆمارى و ههڵويستێن وى بۆ پشتهڤانييا دۆزهيێن ئێزديان و دادمهنديا قوربانيێن ئێزديان بلند نرخاند.