ناڤەندا نووچەیان – سەما
د. ڤیان دەخیل، ئەنداما خۆلا پێنجێ یا عێراقێ داخوازێ ل حکومەتا فیدڕال دکەت زیانڤێکەفتیێن کەمپا باجد کەندالا قەرەبوو بکەت.
ئیڕۆ شەمبوویێ 27ی کانوونا ئێکێ 2025، د. ڤیان دەخیل، ئەنداما خۆلا پێنجێ یا عێراقێ د پەیامەکێ دا ڕاگەهاند: ڕوودانا ل کەمپا باجد کەندالا ڕوودایی و بوویە ئەگەرێ سۆتنا50 دوکانان، نابت وەکو ڕوودانەک هەژمار بکەن، بەلکو شکەستنەکا ئاشکرایە بۆ پاراستنا ژێدەرێ قوتێ ئاوارەیان کو چەندین سالە دبن بەرپرسیارەتیا دەولەتا عێراقێ دا دژین.
دیار ژی کر، حکومەتا فیدڕالی کو بەرپرسیارە ژ کەیسا ئاوارەیان و کەمپان، بەرپرسیارەتیا یاسایی و ئەخلاقی ب ستۆیێ خۆڤە دگرت ژبەر ئەوا ل کەمپێ ڕوودایی.
د پشکەکا دی یا پەیاما خۆ دا نڤیسییە، داخوازێ ل حکومەتا عێراقێ دکەین زیانڤێکەفتیان قەرەبوو بکەت و لیژنەیەکێ پێکبینت بۆ مەزاختنا قەرەبوویێ، پێرابوونێن بلەز بێنە کرن بۆ دووبارە نەبوونا ڤان جۆرە کارەساتان ل کەمپان، زێدەباری ئەنجامێن ڤەکۆلینێ بۆ ڕایا گشتی ڕابگەهینن و سزادانا لایەنێن خەمساری کری.
ئاماژە ب وێ چەندێ دا، پشتگوخستنا کەمپان ئێدی جیێ قەبوولکرنێ نینە و سەرەدەریکرن دگەل ئازارێن ئاوارەیان ب کارڤەدانا بەرسڤدانێ کێشەیێ مەزن تر دکەت ژبلی چارەسەرکرنێ، دابینکرنا دادپەروەریێ بۆ زیانڤێکەفتیان ژبەر ڤی ئاگرێ ب وان کەفتی، تێستەکا ڕاستەقینەیە بۆ پابەندبوونا حکومەتا فیدڕال ب بەرپرسیارەتیێن خۆ بەرامبەری وەلاتیێن خۆ.
ل داویا پەیاما خۆدا دبێژت: کەرامەت و قوتێ ئاوارەیان، پرسەکا لاوەکی نینە، بەلکو بەرپرسیارەتیا نیشتیمانی یە و نابت گیرۆ بکەن.