ناڤەندا نووچەیان – سەما
سەرۆک بارزانی ڕاگەهاند: ئەو ڕەوشا مەترسیدار و شەڕ و توندوتیژییا کو نوکە ل باژێرێ حەلەبێ هەین جهێ دلگرانیەکا زۆرە و مەترسی ئێخستییە سەر ژیانا خەلکێ سڤیل و وەلاتیێن بێ گونەهـ و گەفێن پاکتاوکرنا ڕەگەزی ل دژی کوردان ل وێ دەڤەرێ هەینە.
چارشەمبوویێ، 7ـی کانوونا دووێ 2026، سەرۆک بارزانی دەربارەی ئاڵۆزیێن تاخێن کوردنشین ل باژێرێ حەلەبێ ل ڕۆژئاڤایێ کوردستانێ، پەیامەک بەلاڤکر.
دەقێ پەیاما سەرۆک بارزانی:
گوهۆڕینێن سیاسی یێن سووریێ دەلیڤەکا باش بوو بۆ دیتنا ڕێگەچارەکا گونجایی داکو مافێن ڕەوا یێن گەلێ کورد ل سووریێ بهێتە لبەرچاڤ گرتن و هەموو کێشە ژی بهێنە چارەسەرکرن” ژ پێخەمەت وێ چەندێ ژی، مە ل گەل هەمو لایەنان گەلەك هەولدان کو پێدڤبییە هەر چ گرفت و ناكۆكی هەنە ب ڕێیا دیالۆگێ و ب شێوازەکێ ئاشتیانە بهێنە چارەسەر کرن.
بەلێ ئەڤ رەوشا مەترسیدار و ئەو شەڕ و توندوتیژیا کو نوکە ل باژێرێ حەلەبێ هەیی، جهێ نیگەرانیەکا زۆرە و مەترسی ل سەر ژیانا خەلکێ سڤیل و وەلاتیێن بێتاوان دروستکرییە، و هێرشا پاقژکرنا ڕەگەزی (تطهیر عرقی) ل دژی کوردان ل وێ دەڤەرێ هەیە.
داخوازێ ژ دەسهەلاتدارێن سووریێ دکەم کو ناکۆکیا سیاسی نەکەنە ناکۆکیا نەتەوەیی، د وان کێشە و گرفتێن ل دەڤەرا حەلەبێ هەیی ڕێك نەهێتە دان وەلاتیێن کورد تووشی فشار و زەبر و زەنگ و دەرئێخستنێ ژ جهێ باب و باپیرێن خۆ و پاقژکرنا ڕەگەزی ببن.
هەروەسا داخوازێ ژ لایەنێن کوردی و ب تایبەتی هەسەدە دکەم ئەوا د شیانێن وان دا هەبیت ئەنجام بدەن ژ پێخەمەت ڕاگرتنا شەڕ و پێکدادانان و ڕێگریکرنێ ژ خوینڕێژتنا زێدەتر، هەردو لایەن کا بکەن بۆ گرتنەبەرا ڕێیا دیالۆگ و دانوستاندنان بۆ چارەسەرکرنا کێشەیان.
نابیت هەبوونا ناکۆکیا سیاسی ببیتە ئەگەرێ هندێ کو ژیانا خەلکێ سڤیل بکەڤیتە د بن مەترسیێ دا و پاقژکرنا رەگەزی ل دژی گەلێ کورد ڕووبدەت، چونکی ئەڤە تاوانە ل دژی مرۆڤایەتیێ و دەرئەنجامێن مەترسیدار دێ لدووڤ دا هێن.