ناڤەندا نووچەیان – سەما
وهكيلێ ميرێ ئێزدييان ئاشكرا كر، پرانيا ئاوارهيێن ئێزدى ل حهلهبێ گههشتينه عهفرينێ و پێدڤى ب هاريكاريێن مرۆڤى يێن بلهزن.
جههوهر عهلى بهگ، وهكيلێ ميرێ ئێزدييان بۆ كاروبارێن پهيوهندييان، ئيرۆ شهمبوويێ 10ـى كانوونا دووێ 2026، بۆ سهما ڕاگههاند: ژ ئهگهرێ هێرشێن هێزێن سوپایێ عەرەبی یێ سووریێ بۆ سهر تاخێن شێخ مهقسوود و ئهشرهفييێ ل باژێرێ حهلهبێ، كو ب ههزاران ئێزدى تێدا ئاكنجينه و بۆ قورتالكرنا ژيانا خۆ ئاوارهيى باژێرێ عهفرينێ بووينه.
دهربارهى ڕهوشا ئاوارهيێن كورد، وهكيلێ ميرێ ئێزدييان گۆت: ئاواره د ڕهوشهكا پهريشان دا دژين و داخوازێ ل ههموو ڕێكخراوێن مافێ مرۆڤى دكهين ههر زوو هاريكاريێن مرۆڤى بگههيننه ملهتێ كورد.
دووپاتكر، هيڤيدارين وهلاتێن زلهێزێن جيهانێ بێنه سهر هێلێ و ئهڤێ كۆمكوژيێ ل سهر ملهتێ كورد ل حهلهبێ بسهكنينن.
ل گۆڕهيى زانيارييان نێزيكى 1200خێزانێن ئێزدى ل ههردو تاخێن ناڤبرى دژين، كو پتريا وان بهرى نۆكه ژ عهفرينێ قهستا وان تاخان كربوو.
ل سێشەمبوویا بۆری، هێزێن سوپایێ عەرەبی یێ سووریێ ئێريش کرە سەر تاخێن شێخ مەقسوود و ئەشرەفيیە و ل حەلەبێ و ئاسایشا ناڤخۆ یا تاخان کو سەر ب رێڤەبەرییا خۆسەرە، ب توندی بەرگری کر و نەهێلان پێشڤەچوونێ بکەن.