ناڤەندا نووچەیان – سەما
ئيرۆ پێنچ شهمبوويێ 29ـى كانوونا دووێ2026، د.عهلى تهتهر، پارێزگارێ دهۆكێ سهرا عومبارێن ڕێڤهبهریا كۆچ و كۆچبهران دا و ژلایێ ئهندامێن لیژنا بلند یا كۆمكرنا هاریكاریيا بۆ خهلكێ ڕۆژئاڤایێ كوردستانێ و نوونهرێن دهزگههێ خێرخوازیێ بارزانى پێشوازى لێ هاته كرن.
پارێزگارێ دهۆكێ ژ نێزیك ڤه تهماشهى قهبارێ وان هاریكاریيا كر یێن ب ڕێيا لیژنا بلند یا پارێزگههێ بۆ خهلكێ ڕۆژئاڤایێ كوردستانێ هاتینه كۆمكرن.
پارێزگارێ دهۆكێ دكۆنگرهكێ ڕۆژنامهڤانى دا سوپاسى ودهستخۆشى ل لیژنا سهرپهرشت و ههموو خهلكێ پارێزگههێ ل ناڤ و دهرڤه و ههموو لایهنان و ئۆل و نهتهوهیان و پێكهاتهیێن پارێزگههێ و خۆبهخشا كر، كو ب ههستهكا مرۆڤایهتى و نیشتيمانى و نهتهوهیى ل دووڤ بانگاوازا پارێزگهها دهۆكێ هاتین و هاریكاریێن مادى و مهعنهوهى پێشكێشى خهلكێ ڕۆژئاڤایێ كوردستانێ كرین.
ههروهسا دوپاتكر، كۆمكرنا هاریكاریيا بۆ ڕۆژئاڤایێ كوردستانی دێ یا بهردهوام بت و هاریكارى دێ ل ڕێڤهبهریا كۆچ وكۆچبهران ئێنه وهرگرتن و دهزگههێ خێرخوازیێ بارزانى ژى دێ گههینته ههموو لێقهومیا ههتا ڕهوشا ڕۆژئاڤا ئارام دبت.
پارێزگارێ دهۆكێ دیاركر، د ڕۆژانێن كهمپینێ دا 100بارههلگرێن كهلوپهلێن خوارنێ و تهندورستى و جلوبهرگ و پێدڤیێن ژیانێ و پتر ژ (600) ملیۆن دینارا هاتینه كۆمكرن و ئهڤ پرۆسهیه دێ یابهردهوام بت و ههموو هاریكارى قۆناغ قۆناغ و لدووڤ بهرنامهكێ ڕێكخستى دێ بۆ ڕۆژئاڤایێ كوردستانێ ئێنه هنارتن و ل داویا ڤێ پڕۆسێ قهبارێ گشتى یێ ڤان هاریكاریا دێ ئێته دیاركرن.