ناڤهندا نووچهیان – سهما
ئيڕۆ سێ شەمبوويێ، 24ـی شوباتا 2026، مەسرور بارزانی، سەرۆکێ حکومەتا هەرێما کوردستانێ، پڕۆژێ ستراتیژی يێ جۆتسایدێ (هەولێر – گۆمەسپان)ـی ههمبهرى شۆفێران و وهلاتيان ڤهكر و ڕاگەهاند، پڕۆژە دێ ئاسانکاریيهكا مهزن بۆ هاتنوچۆنێ پێكڤهگڕێدانا باژار و باژاڕۆكێن کوردستانێ كهت.
د گۆتارهكێ دا ڕێوڕەسمێن ڤهکرنا پڕۆژەيى دا، سەرۆکێ حکومەتا هەرێما کوردستانێ ئاماژە ب وێ چهندێ کر، بهرى نۆكه هاتنوچۆن دڤێ ڕێ دا جهێ مەترسیێ بوو، بەلێ نۆكه ب دروستکرنا ئهڤى جۆتسايدى، سلامەتیا گیانێ وهلاتيان ب پلەیا ئێكێ دێ پاراستى بت.
سەرۆکێ حکومەتێ گۆتژى: “ئەڤ رێيه دێ ئاسانکاریيێ بۆ وهلاتيان كهت د دهمهكێ كێمتر دا بگەهنە جهێن خۆ، هەروەسا گرنگییەکا مهزن هەیە بۆ پێكڤهگرێدانا هەولێرێ ب گۆمەسپان، دۆلی سماقولی، کۆیە و سلێمانیێ، و ژ لايهكێ دى ڤه ڤهگەڕيان بۆ هەولێرێ ب ڕێيا بەستۆڕە.”
مەسرور بارزانی سوپاس و دەستخۆشی ئاراستەی کۆمپانیا جێبەجێکار (هێمن گرووپ)، ئەندازیار، وەزارەتا ئاڤەدانکرن و پارێزگارێ هەولێرێ کر، کو كارينه د دهمهكێ پيڤانهيى و ب ستاندارێن نێڤدەولەتی پڕۆژەيى بجهبينن. هەروەسا خۆشحالی و سەربلنديا خۆ دەربڕی کو نۆكه ل هەرێما کوردستانێ کۆمپانیيێن ناڤخۆیی ئاست بلند هەنه دكارن پڕۆژەیێن وهسا مهزن دروست بکەن.
د پشكهكا دى يا گۆتنێن خۆ دا، سەرۆکێ حکومەتێ بهحس ل ڤهژاندانا کەرتێ گەشتیاری ل دهڤهرێ کر، ب تایبەتی پشتى تهمامبوونا بەنداڤا گۆمەسپان کو ڕێيهكا ههڤشێوە بۆ هاتييه دروستکرن. هیڤى خواست ژبهر بارانبارینا باش يا ئەڤ ساله، وهلاتى ل وەرزێ بەهارێ دا بكارن ب ساناهى سەرهدانا دهڤهرێ بکەن و خۆشييێ ژ سروشتێ جوانێ کوردستانێ وەربگرن.
ل داوييا پەیاما خۆ دا، مەسرور بارزانی داخوازييهك ئاراستەی شۆفێران کر و گۆت: “داخوازێ ل خەلکێ دكهم بۆ پاراستنا ژیانی خۆ و وهلاتيێن دى، رێنمایێن هاتنوچۆنێ ل بهرچاڤ وهربگرن و ب لهزاتى ترۆمبێلێ نههاژۆن، بۆ هندێ ئهم ژى بكارين خزمەتا زێدهتر پێشکێش بکەین.”