ناڤەندا نووچەیان- سەما
وەزیرێ ساخلەمییا عێراقێ رەزامەندی ل سەر ڤەگوهاستنا کارمەندێن ساخلەمییێ یێن ئێزدی یێن دەوامێ ل پارێزگەها مووسل دکەن دا.
مەحما خەلیل، پەرلەمانتارێ خۆلا پێنجێ یێ پەرلەمانێ عێراقێ ل گەل سالەح حەسناوی، وەزیرێ ساخلەمییا عێراقێ کۆم بوو.
نڤیسینگەها ڕاگەهاندنا پەرلەمانتار مەحما خەلیل ڕاگەهاند، دکۆمبوونێ دا ڕەوشا کەرتێ ساخلەمییێ ل پارێزگەها نەینەوا و تەمامکرنا ئاڤاکرنا نەخۆشخانا شنگالێ یا 100 تەختی و دانانا بەرێ بنیاتی بۆ نەخۆشخانا سنوونێ یا 50 تەختی بەحس کرن.
مەحما خەلیل دیارکر، ڕێژەیا کارکرنێ ل نەخۆشخانا شنگالێ گەهشتییە 20% و خواست گڤاشتنێ ل کۆمپانیا جێبەجێکار بکەن بۆ بلەزتر کار دڤی پڕۆژەیی دا بکەن.
ب گۆڕەیی نڤیسینگەهێ، پەرلەمانتارێ ئێزدی رەزامەندییا وەزیرێ ساخلەمییێ بدەستڤەئینا بۆ ڤەگوهاستنا هەموو کارمەندێن ساخلەمییێ یێن ئێزدی یێن ل مووسل دەوامێ دکەن بۆ ناڤا شنگالێ.
کاودانێن ئێمناهی و ئابۆری و ئاوارەییێ یێن خەلکێ شنگالێ تێدا دەرباز دبن، بوویە ئێک ژ ئاستەنگێن هاتنوچۆنێ ب تایبەت بۆ کارمەندێن ساخلەمییێ یێن ئێزدی ل پارێزگەها مووسل.