ناڤهندا نووچهیان – سهما
سەرۆك مەسعوود بارزانی پەیامەکا ڤیدیۆیی ب هەلكەفتا جەژنا نەورۆزێ بەلاڤكر و راگەهاند: “چ ستەمكارەكی نكارییه ئیرادەیا گەلێ كورد رابگرت.
سەرۆك بارزانی هەروەسا دبێژت: هەموو بزاڤێن مە بۆ وێ چەندێ بووینە كو كوردستان نەبتە پشكەك ژ شەڕ و ئالۆزییێن دەڤەرێ.
چیرۆكا سەرەكی: ل 21ـی ئادارێ، سەرۆك بارزانی ب پەیامەکا ڤیدیۆیی ب هەلكەفتا جەژنا نەورۆزێ پشكدارى ئاهەنگێرێن كوردێن دیاسپۆرا (تاراوگە) ل باژێرێ بۆن یێ ئەڵمانیا كر و راگەهاند: “كورد چ جاران دەست ژ مافێن خۆ بەرنەدهن، داخوازێ دكەم ئێكدەنگبن و ئێكرێزیا خۆ بپارێزن.
سەرۆك بارزانی د وێ پەیامێ دا داخواز ژ كوردێن دەرڤەی وڵاتی كر كو ببنە پشت و پەنا بۆ ئێك و بەرژەوەندییا نەتەوەیی بێخنە سەرێ هەموو ئایدیا و بیروبوچوونێن سیاسی.
دەقێ پەیاما ڤیدیۆیی یا سەرۆك بارزانی:
خوشك و برایێن هێژا كوردستانیێن رێزدار
ب خێر بهێن بۆ وێ كۆمبوونا جەماوەری ب هەلكەفتا یادا جەژنا نەتەوەیی یا نەورۆزێ، من ژ دل حەز دكر دگەل هەوە پشكدار بم د وێ رێورەسما تژی جۆش و خروش دا، لێ ژبەر وی بارودۆخ و ئالۆزییێن ل دەڤەرێ هەی، ب لێبۆرین ڤە نكارم دگەل هەوە پشكدار بم، ئەز دخوازم ژ دل پیرۆزباهییا جەژنا نەورۆزێ ل هەوە و هەموو كوردستانیێن عهزیز ل كوردستانێ، ئەوروپا، ئەمریكا و هەر جھەكێ دی یێ جیهانێ بكەم كو كورد لێ دژین.
نەورۆز بتنێ هاتنا وەرزەكی و نویبوونا سروشتی و رێككەفتەك نینە، بەلكو نەورۆز بۆ كوردستانیان نیشانا ژیانێ و ئازادیێ یە.
نیشانا دەستپێكەکا نووی و رابوون و ئۆمێد و هەلاتنا رۆژەكا نوی یە.
نەورۆز هیڤییا گەلەكی یە كو ب چ رەنگان بۆ ماف و ئازادییا خۆ دەست ژ خەبات و بەرخودانێ بەرنەدایە.
ئاگری نەورۆزێ زێدەتر ژ دوو هزار و 700 سالانە د دلێ هەر كوردستانییەكێ دایە، پەیامەكە بۆ هەموو جیهانێ كو ئەڤ گەلە خودان ئیرادەیا خۆیە و چ بەربەست و ستەمكارەكی نكارییه وێ ئیرادێ رابگرت.
نەورۆز ئاگرەكە بۆ ئازادیێ و باوەری ب خۆبوونێ و سەرنەچەماندنێ د دلێ تاك ب تاكێ كوردستانێ دا.
كوردستانیێن هێژا و خۆشتڤی
ئەم كورد ل هەر جھەكی بین، ل كوردستانێ یان ل ئەوروپا یان ل ئەمریكا یان ل هەر جھەكێ دی، ل هەموو جیهانێ ئێك پەیاما سەرەكی مە كۆم دكەت؛ ئەو ژی ناسنامەیا كوردایەتیێ و ڤیانا ئازادیێ یە، ئەز گەلەك دلخۆشم ئیرۆ ل باژێرێ بۆن ل ئەڵمانیا وی ژمارەیا زۆر یا وەلاتیێن كورد دبینم، كو ئەڤە ب خۆ نیشانا ئێكرێزی و هەڤدەنگییا كوردانە.
ئهڤه نیشانا هندێ یە كو كورد ل هەر جھەكی بن، دكارن ب ئێك دل و ئێك دەنگ بۆ ماف و ناسنامەیا خۆ مل ب ملێ ب سهكنن، ئەوژی رێكەکا دروستە و رێكا رزگاربوونێ یە، داخوازێ ژ هەوە دكەم د هەموو دەمان دا وێ ئێكرێزی و ئێكدەنگییا خۆ بپارێزن.
نوكە ئەم د سەردەمەكی دا دژین كو هەموو جیهانێ چاڤ ل سەر كوردانە، ئەگەر ئەم ب خۆ هەبین و ئێكرێز بین و پشت و پەنایا ئێك بین، پشتراست بن جیهان ژی دۆست و هاریكار و پشتهڤانێ مەیە، وهلاتێن ئۆروپا بووینە مالا دووێ یا ژمارەیەکا زۆر یا كوردێن هەر چار پارچەیان، لێ ئەز پشتراستم دلێ هەوە هەموویان دگەل ئاخ و وهلاتێ وەیە. ئەز داخوازێ ژ هەوە دكەم، زارۆكێن خۆ ژ زمان و كلتوورێ كوردی ڤهنهقهتینن، و هەر كوردەكێ ل دەرڤەی كوردستانێ دژیت، پێدڤییە ببتە باڵیۆزێ نەتەوا خۆ و نموونەیا بلند یا شارستانی و بەهایێن بلند یێن گەلێ خۆ، هەروەسا رێزێ ل یاسایێن وان وهلاتان بگرن یێن كو سالانە هوون لێ دژین و بۆ وە وەكو پەناگەهەك بووینە.
كوردستانیێن خۆشتڤی، خوشك و برایێن هێژا
جھێ خۆشحالیێ یە كو رۆژئاڤایێ كوردستانێ ژ كارەسات و نەهامەتییان هاتە پاراستن، هیڤیدارم رێز ل ماف و داخوازییێن كوردان ل سوریێ بهێتە گرتن.
هەروەسا پشتهڤانیێ ل پرۆسەیا ئاشتیێ ل توركیا دكەین و هیڤیدارین بگەهتە ئەنجامەكێ باش كو د خزمەتا هەموو لایەكی دا بت.
د دەمێ نوكە دا كو جیهان تژی یە ژ گۆڕانكارییێن مەزن، مخابن دەڤەرا مە د ناڤ شەڕ و ئالۆزییان دا دەرباز دبت، د ڤی بارودۆخێ تەنگ دا جیهان ب گشتی پێدڤی ب ئاشتی و ئارامیێ یە. پەیاما گەلێ كوردستانێ هەموو دەمان پەیاما ئاشتی و ئارامیێ بوویە، هەموو بزاڤێن مە بۆ هندێ بووینە كو كوردستان نەبتە پشكەك ژ وان كێشە و هەڤڕكییان، هیڤیدارم خوشك و برایێن مە ل رۆژهەلاتێ كوردستانێ و هەرێما كوردستانێ ژ شەڕ و ئالۆزی و ناخۆشییێن دەڤەرێ پاراستی بن.
ل دوماهیێ جارەکا دی پیرۆزباهییا جەژنا نەورۆزێ ل وە دكەم و هیڤییا سالەکا نوی یا تژی بەختەوەری و شادی بۆ هەوە دخوازم. ل ڤێدهرێ داخوازێ ژ وە دكەم وەكو خوشك و برا پشت و پەنایا ئێك بن و بەها و پرەنسیپێن نەتەوەیی ل سەری هەموو بەرژەوەندی و هزر و ئایدۆلۆژییان بن، ئەم هەموو ل كوردستانێ ئۆمێد و هیڤییێن مەزن ب شیان و كاریگەریا هەوە یا رەوەندا كوردستانی و كوردێن دەرڤەی كوردستانێ هەنە بۆ ب هێزكرن و ناساندنا دۆزا رەوا یا گەلێ كوردستانێ ب جیهانێ.
نەورۆز و سالەکا خۆش بۆ هەوە.
من ئۆمێدەكا مەزن ب پاشەڕۆژا گەلێ كوردستانێ هەیە و سەركەفتن ژی هەر بۆ گەلێ مە یە.
سلاڤ ل گیانێ شەهیدێن رێكا ئازادیێ ل هەر جھەكی بن. ب پێدڤی دزانم سوپاسییا كۆنفیدراسیۆنا رەوەندا كوردستانی بكەم بۆ وێ ئەركێ كێشایی.
نەورۆزا وە پیرۆز بت و هەر د خۆشی و خێرێ دا بن.