تۆرا لالش

بنگه‌هێ لالش یێ ره‌وشه‌نبیری و كۆمه‌لایه‌تی ب هه‌لكه‌فتا سالرۆژا وه‌غه‌ركرنا بابێ رۆحیێ نه‌ته‌وا كورد مه‌لا مسته‌فا بارزانی (بارزانی نه‌مر) په‌یامه‌كێ به‌لاڤ دكه‌ت.

ئیرۆ 47 سال بسه‌ر وه‌غه‌را دویماهیێ یا بارزانیێ نه‌مر رێبه‌رێ بزاڤا رزگاریخوازا گه‌لێ كوردستانێ دا ده‌رباز دبن.

بارزانیێ نه‌مر د قوناغه‌كا دیرۆكى و چاره‌نڤیسی دا، خه‌بات و شۆڕش ل هه‌مبه‌ر داگیركه‌رێن كوردستانێ یێن خودان هێز‌ هه‌لبژارت، كو گه‌لێ كورد د سه‌رده‌مه‌كێ نه‌خۆش و پڕ ده‌رده‌سه‌رى دا دژیا و چ پشت و په‌نا نه‌بوون ژبلى چیایان.

د وى سه‌رده‌مێ بێهیڤبوونێ دا بارزانیێ نه‌مر ده‌ست ب خه‌باتێ بۆ نه‌ته‌وه‌یا خۆ كر و میرات و خه‌باته‌كا ب ده‌هان سالان بۆ نه‌ڤیێن نه‌ته‌وه‌یا كورد ل پشت خۆ هێلا. 

تێ زانین ل 11ـی ئه‌یلولا 1961 هه‌تا 1975ـێ مه‌زنترین شۆره‌شا چه‌كداری ل سه‌رانسه‌ری كوردستانێ بۆ ئێكه‌مین جار ب پشكدارییا هه‌موو پێكهاته‌یان مل ب ملێ هه‌ڤدو ب سه‌رپه‌رشتییا ڕێبه‌رێ نه‌ته‌وا كورد بارزانی نه‌مر ل هه‌موو ده‌ڤه‌رێن باشورێ كوردستانێ ل دژی ده‌ستهه‌لاتدارێن به‌غدایێ به‌رپابوو و تێدا چه‌ندین ده‌ستكه‌فێن نه‌ته‌وه‌یی و نشتیمانی بۆ خه‌لكێ كوردستانێ ب ده‌ستڤه‌ئینان و ژوانژی رێژێما به‌عسا ژ ناڤچۆیی نه‌چار بوو دانپێدانێ ب مافێن ڕه‌وا یێن گه‌لێ كوردستانێ بكه‌ت، و ب ڤێ یەكێ بزاڤا رزگاریخوازا كوردستانێ چوو د قۆناغەكا نووی دا.

 هه‌روه‌سان بارزانیێ نه‌مر ل هه‌موو ده‌مان دووپاتی ل وێ چه‌ندێ كرییه‌ كو ئێزدی پێكهاته‌یه‌كا ره‌سه‌ن یا كوردستانێ نه‌ و  لدۆر ڤێ چه‌ندێ هه‌رده‌م گۆتییه‌ كوردێن ره‌سه‌ن ئێزدینه‌، هه‌روه‌سان ڕۆلێ ئێزدیان د شۆره‌شێن كوردستانی دا بلند نرخاندیه‌. 

بارزانیێ نه‌مر پشتى ده‌هان سالێن خه‌بات و تێكوشانێ دژى نه‌یار و داگیركه‌رێن كوردستانێ و راوه‌ستیان همبه‌ر دوژمنێن گه‌لێ كورد ب ئیراده‌یه‌كا پیلایی، ل سالا 1979ێ ل ئێك ژ نه‌خۆشخانه‌یێن ئه‌مریكا وه‌غه‌را دویماهیێ كر. 

سلاڤ ل گیانێ پاكێ بارزانیێ نه‌مر و هه‌موو شه‌هیدێن كوردستانێ، ناڤێ بارزانی ب زیندى و بیرهاتن و رێباز و خەبات و ژیانا وی هه‌ر دێ ب نەمری د دیرۆكا گه‌لێ كوردستانێ دا مینت، بارزانی دیرۆک و ناسناما گەلێ کوردستانێ یە.

ده‌سته‌یا بلندا بنگه‌هێ لالش/دهۆك

1ـی ئادارا 2026ێ