جوتكارهك: كۆمهلگهها مهههتێ ژێدهرهكێ زهنگینێ چاندنێ یه
و ئاوارهیان كهرتێ كشتوكالی ڤهژاندییه
ناڤهندا نووچهیان – سهما
د لێدوانهكا تایبهت دا بۆ كهناڵێ سهما، جوتكار (فهرهج عثمان) تیشك خسته سهر گرنگی و پێشینهیا مێژوویی و ئابووری یا كۆمهڵگهها مهههتێ و دیار كر كو ئهڤ دهڤهره ئێكه ژ زهنگینێن دهڤهرێن چاندنێ ل دهڤهرێ.
ناڤهاتی ئاماژه ب وێ چهندێ دا كو كۆمهلگهها مهههتێ ژ 10 گوندان پێكدئێت و رووبهرێ زهڤیێن وێ یێن چاندنێ نێزیكی 25,000 دۆنمانه، ههروهسا ل دۆر مێژوویا ئاكنجیبوونا ڤێ كۆمهڵگههێ گۆت: “ل سالا 1975ێ، گوندێن دهوروبهرێن مهههتێ ژ ئالیێ رژێما بهعس یا ژناڤچۆیی دا ب شێوهیهكێ ب زۆرهملی د ناڤ كۆمهڵگههێ دا هاتنه كۆمكرن”.
ڤهژاندنا كهرتێ چاندنێ
ناڤبری دیار كر كو ل ڤان سالێن دووماهیێ، كهرتێ چاندنێ ل دهڤهرێ گهشهكرنهكا مهزن ب خۆڤه دیتییه، ب تایبهت پشتی كۆلانا چهندین بیرێن ئیرتوازی ل دهڤهرا “باسكێ شێخا”، كو ئهڤ چهنده بوویه ئهگهرێ ڤهژاندنا دووبارە یا كشتوكالی.
ڕۆلێ ئاوارهیان و ههمهجۆرییا بهرههمی
گۆتژی:”بهری نوكه چاندنا بهرههمێن وهك پتاته، باجانڕهش، باجانشۆرك، پیڤاز و بامیێ ههبوو لێ ب رێژهیهكا كێم بوو، پشتی كارهسات و فرمانا سالا 2014ێ و ئاوارهبوونا خهلكێ شنگالێ بۆ دهڤهرا مه، ئهوان ب شێوهیهكێ بهرفرههتر د ڤی بیاڤی دا كار كر و رۆڵهكێ مهزن د ڤهژاندنا چاندنێ دا گێڕا.”
ل دووماهیێ ژی ئاشكرا كر كو نوكه ل دهڤهرێ نێزیكی 15 جورێن جیاواز یێن بهرههمێن كشتوكالی دهێنه بهرههمئینان، كو ئهڤه ژی هێزهكا مهزن ددهته ئابووریێ دهڤهرێ.