ناڤه‌ندا نووچه‌يان – سه‌ما
سەرۆک وەزیران سالڤه‌گه‌ڕا سه‌رهلدانێ ل خەڵکێ هەرێما کوردستانێ پيرۆز دكه‌ت و دوپاتكر، “ل ژێر چ فشار و هێرشه‌كێدا، دەستان ژ مافێن خۆ يێن ڕەوا به‌رناده‌ين”.
دەقێ پەیاما سەرۆک وەزیران مەسرور بارزانی ب هه‌لكه‌فتا 34هەمین سالڤه‌گه‌ڕا سه‌رهلدانا خەڵکێ کوردستانێ:
د 34 سالییا سه‌رهلدانا ئادارا 1991 يا خەلكێ كوردستانێ، گەرمترين پيرۆزباهى ل هه‌موو كوردستانيان، ب تايبەتى پێشمەرگەيێن قارەمان و مالباتێن سەربلندێن شەهيدان دكەم.
ئێك ژ سەروەريێن مەزن يێن گەلێ كوردستانێ، كو هەردەم جهێ شانازيا مەنە، سه‌رهلدان يا گەلێ كوردستانێيە، كو هەموو پێكهاتێن گەلێ كورد پشكدارى تێداكربوو و ب ئەنجامێ ئێكڕێزيیێ و ئێكگرتنا گەلێ كوردستانێ و هێز و لايەنێن كوردستانى هاتەكرن، داكو هەرێما كوردستانێ ژ زۆلم و داگيركارييێ بهێتە ئازادكرن و ب ئەنجامێ هەلبژارتنەكا ئازاد و ديموكراتيك، پەرلەمان و حكومەتا هەرێما كوردستانێ هاتنە دامەزراندن.
ئيرۆ بيرئانينا ڤێ سه‌رهلدانا مەزن و ب سه‌ربلند دكەين، ژ هەموو دەمان زێدەتر، پێدڤى ب ئێكڕێزى و هەڤهەلويست بوونێ هەيە ل سەر بەرەڤانيكرن ژ قەوارەيا دەستوورى و دامەزراوێن ياسايى و شەرعى يێن هەرێما كوردستانێ و وان دەستكەڤتان كو ب خەبات و قوربانيدان و گيانفيدايى يا پێشمەرگەيێن قارەمان و خوينا گەش يا شەهيدێن سەربلند مە ب دەستڤه‌هاتى، ج جاران خەلكێ كوردستانێ، ل ژێر چ فشار و هێرشه‌كێدا، دەستان ژ مافێن خۆ يێن ڕەوا به‌رناده‌ت.