ناڤهندا نووچهیان – سهما
دادگەهەکا پاریس، پشتی پشتراستبوونا تۆهمەتا دەستهەبوونێ د جینۆساید و کۆمەڵکۆژیا ئێزیدییان دا ل سووریا و عێراقێ، سزایێ زیندانکرنا هەتا هەتایێ ب سەر داعشەکێ فەرەنسی ب ناڤێ “سەبری سەید” دا سەپاند.
ل دووڤ ئاژانسا “فرانس پرێس”، ئێڤاریا ڕۆژا ئینیێ 20ی ئادارا 2026، د پێنجەم رۆژا رونشتنا دادگەها تۆهمەتبارەکێ داعش ب غیابی، دوماهییێ دادگەها تاوانان بڕیار دا کو “سەبری سەید” یێ وهلاتیێ فەرەنسی، تاوانبارە ب ئەنجامدانا جینۆساید و تاوانێن دژی مرۆڤایەتییێ و بتایبهت ل دژی ئێزدیان.
ئێکەم جارە فهرهنسا سزایەکێ ب ڤی ڕەنگی بسەپینت، لێ بەری نوکە ل ئەوروپا سزایێن وەسا ب سەر ئەندامێن ڕێکخراوا داعش دا هاتینە سەپاندن؛ ئێکەم جار ل ساڵا 2021 ل ئەڵمانیا سزایەکێ ب ڤی شێوەی دەرکەفت، پاشان دادگەهێن سوید و بەلجیکا هەمان بڕیار جێبەجێ کرینە.
مارک سۆمەر، سەرۆکێ دادگەها پاریس ڕاگەهاند: “سەبری سەید پشکداری د وێ جینۆسایدێ دا کرییه ئەوا داعشێ ئەنجام دای، ئەو بوویە پشکەک ژ وێ تۆڕا تاوانکاری یا کو کڕین و فرۆشتن ب ژمارەکا زۆرا ئافرەتێن قوربانیێن ئێزدی دکری.”
هەروەسا گۆت: “دادگەهـ گەهشتە وی ئەنجامی کو ب ڕوونی دیارە ڕێکخراوا داعش ب تایبەتی پێکهاتا ئێزدی وەک گروپەکێ ئایینی کربووە ئارمانج.”
ژ لایەکێ دی ڤە، کلیمەنس بێکتارت، پارێزەرا قوربانییان، دەستخۆشی ل ئەنجامێ رەنجا 10 ساڵێن هەوڵێن یاسایی یێن قوربانییان کر و گۆت: “وێ ئافرەتێ ئازایەتی و پێداگرییەکا زۆر نیشان دا بۆ دیدهڤانیێ، د دەمەکێ دا دزانی کو رەنگە ل دوماهییێ ب تنێ ئێک ژ تاوانباران بهێتە سزادان.”
ئەڤە د دەمەکێ دایه سۆفی هاڤار، داواکارا گشتی یا پاریس ڕاگەهاند؛ هەرچەندە دەنگۆیا کوشتنا “سەبری سەید” ل سووریا هەیە، لێ ئەو ئێک بوویە ژ کەسێن سەرەکی یێن تۆڕێن تاوانکاری کو دەست د کۆمەڵکۆژیا ئێزیدییان دا هەی، لەوما گرنگە ئەڤڕۆ دادگەهـ، ئەگەر تۆهمەتبار ئامادەی بەرامبەر دادوەری ژی نەبت، ب غیابی سزایێ زیندانکرنا هەتا هەتایێ ب سەر دا بسەپینت.