ناڤەندا نووچەیان – سەما
پەیڤدارێ حکومەتا هەرێما کوردستانێ ڕادگەهینت، د کۆمبوونا جڤاتا وەزیرێن هەرێما کوردستانێ دا و ل سەر پێشنیارا حکومەتا هەرێمێ، لژنەيهکا بلند یا هەڤپشک بۆ گەنگەشە و چارەسەرکرنا کێشەیێن د ناڤبەرا هەولێر و بەغدا دا دێ ئێتە پێکئینان.
ئيرۆ چارشەمبێ، 10ـى حوزەیرانا 2026، پێشەوا هەورامانی، پەیڤدارێ حکومەتا هەرێما کوردستانێ، د کۆنفرانسەکێ رۆژنامەڤانی دا ڕاگههاند: ” ئەم دخوازین کێشەیێن خۆ دگەل حکومەتا فیدڕال چارەسەر بکەین، لەوڕا ل سەر پێشنیارا حکومەتا هەرێما کوردستانێ، لژنەيهکا بلند یا هەڤپشک بۆ گەنگەشە و چارەسەرکرنا کێشەیێن د ناڤبەرا هەولێر و بەغدا دا دێ ئێتە پێکئینان.”
زێدەتر گۆت: “د پاشەڕۆژەکا نێزیک دا ئەڤ لژنەیە دێ ئێتە پێکئینان، و ب تنێ بۆ چارەسەرکرنا کێشەیان نینە، بەلکو د هەمان دەم دا بۆ بهێزكرنا پەیوەندییانە ژی.”
ئاماژە ب هندێ ژی کر، کو شەڕێ دەڤەرێ زێدەباری مەترسيیێن ئێمناهييێ، قەیرانەکا گران یا دارایی ژی دورستکریيە.
هەروەسا گۆت: “بۆ پرسا پترۆلێ مە دیتنا خۆ یا ڕوون دیارکریە، حکومەتا کوردستانێ هەموو هاریکاریيەکا حکومەتا عێراقێ دکەت. دیسا حکومەتا هەرێما کوردستانێ نە دژی سیستەمێ (ئەسیکۆدا)یە، بەلکو دڤیا زووتر ئەم ل سەر بێینە ئاگەهدارکرن، چنکو بۆ بجهئينانا وێ، پێدڤی ب بەرهەڤیێن مەزن هەیە.”
د پشکەکا دی یا گۆتنێن خۆ دا دبێژت: “هەر دەمێ شاندێ حکومەتا عێراقێ یا بەرهەڤ بت، شاندێ حکومەتا کوردستانێ دێ چتە بەغدا بۆ گەنگەشەکرنێ ل سەر بابهتێ ئەسیکۆدا.”
ئەو چەندە ژی دياركر، کۆمپانيیێن پترۆلێ ل کوردستانێ، داخوازییا گەرەنتیا ئەمنی ژ سەرۆک وەزیرێن عێراقێ کرینە داکو دەست ب بەرهەمئینانا پترۆلێ بکەنەڤە.