ناڤهندا نووچهیان – سهما
سهرێ چهندين سالانه خهلكێ گوندێ “بهکرا” سەر ب ناحیهيا سنوونێ ل قەزا شنگالێ، دناڤ ئازارێن نەبوونا خزمەتگۆزاریێن دهستپێكى دا دژین. ئيرۆ خەلکێ گوندى ب ڕێيا نامەکا فەرمى، بانگهوازييهكا بلهز ئاراستەیی پارێزگارێ نەینەوا، عەبدولقادر دەخیل و نوونەرێن ئێزدیيان ل پەرلەمانێ عێراقێ کر.
ل گۆڕەیى وێ داخوازنامەیيێ کو گەهشتییە دەستێ سهما تيڤى، خەلکێ گوندى گازندەیا خرابیا ڕێيا سەرەکی یا گوندى دکەن کو هەتا نۆکە نەهاتییە قێركرن. ئەڤ چەندە د وەرزێ بارانێ دا دبتە ئەگەرێ هندێ کو گوند ب تەمامى ژ دەوروبەرێن خۆ بێتە ڤەقەتاندن، کو مەترسیيێ ل سەر ژیانا نەخۆش و قوتابیان پەیدا دکەت.
هەروەسا، نەبوونا تۆڕا کارەبێ کێشەیەکا دی یا مەزنە کو ژیانا ڕۆژانە یا خەلکێ ب زهحمهت ئێخستييه و ڕێگریێ ل گەشەپێدانا ئاڤەدانکرنێ ل وێدهرێ دکەت.
د ڤێ بانگهوازييێ دا، خهلك داخوازا دو خالێن سەرەکی دکەن ئهو ژى قيركرنا جادەیا سەرەکی و کێشانا هێلێن کارەبێ بۆ ناڤا گوندى.
نوونەرێن خهلكێ گوندێ ناڤبرى د ناما خۆ دا دیار کریيە کو ئەو د چاڤەڕێى هەلویستەکێ خەمخۆرانە و ب کرداری نە ژ ئالييێ لایەنێن پەیوەندیدار ڤە، دا کو مافێن وان یێن دهستوورى و خزمەتگۆزارى بێنە دابینکرن و بارێ گران یێ ل سەر شانێن وان سڤک ببت.