دهۆک – نووچە
هونەرمەندێ وێنەکێش “ئەنوەر خێری” د دیدارەکێ دا بەحسێ ئەزموونا خوە یا هونەری دکەت و دیار دکەت کو ئارمانجا وی یا سەرەکی ئەوە کهلتور، فۆلکلۆر و ڕەوشا جڤاکێ ئێزدی ب تایبەت دەڤەرا شنگالێ ب ڕێکا ڕەنگان نیشا جیهانێ بدەت.
ئەنوەر ئاماژێ ب وێ چەندێ دکەت کو حەز و خۆلیا وی بۆ وێنەکێشانێ بۆ چەندین سالان ڤەدگەرت، لێ ب شێوەیەکێ فەرمی و بەردەوام ل سالا 2019ێ دەست ب ڤی کاری کریە، دبێژت: ئەز دخوازم د هەر تابلۆیەکێ دا کهلتورێ مە یێ زهنگین و ڕەسەنێ شنگالێ بەرجەستە بکەم.
پشکەکا مەزن یا کارێن وی هونەرمەندی تەرخانکرییە بۆ بابەتێن مرۆڤایەتی و نەتەوەیی، ب تایبەت کارەساتێن ب سەر شنگالێ دا هاتین، ناڤبری دیار کر کو وێنێن وی پتریا وان ل سەر پهرستگهها لالش، و دیوارێن قوتابخانەیان هاتینە کێشان، هەروەسا ئاماژە ب وێ چەندێ ژی کر کو ل سەر داخوازا هندەک گروپان، هندەک ژ کارێن وی ل سەر دیوارێن گوندێ “پڕا دەلال” ل زاخۆ هاتینە نەخشاندن.
دەربارەی تەکنیکێن وێنەکێشانێ، خێری دیار دکەت کو ئەو ڕەنگێن زەیتی و ئاڤی ب کار دئینت. یەک ژ کارێن وی یێن هەرە دیار، تابلۆیەکا هەڤپشک بوو دگەل وێنەکێشێ ناڤدارێ ئەمریکی “مایکل دی مۆرتینۆ” (Michael DiMartino)، کو دەنگڤەدانەکا باش ل سەر ئاستێ جڤاکی هەبوو.
ل داوییا ئاخفتنا خوە دا، ئەنوەر خێری پەیامەک ئاراستەی گەنجان کر کو ب ڕێکا هونەری پەیاما مللەتێ خوە بگەهینن. ئارمانجا وی ئەوە د پاشەڕۆژێ دا پێشانگەهەکا تایبەت ڤەکەت و ببتە ئەگەرێ هاندانا کچ و کورێن ئێزدی بۆ پەرەپێدانا بەهرەیێن وان.