ناڤەندا نووچەیان – سەما
ئیرۆ دووشەمبوویێ 11ی ئەیارا 2026، ب هەلکەفتا دەربازبوونا 33 سالان ل سەر دامەزراندنا بنگەهێ لالش یێ ڕەوشەنبیری و کۆمەلایەتی ل دهۆکێ، مەکتەبا ڕێکخستنا پارتی دیموکراتی کوردستان ل بەهدینان پەیامەکا پیرۆزباهییێ بەلاڤ کر.
مەکتەبا ڕێکخستنا پارتی د پەیاما خۆ دا دیارکر، بنگەهێ لالش بوویە مینبەرەکا ڕاستەقینە بۆ گەهاندنا دەنگێ مەزلۆمیەت و ئێش و ئازارێن کوردێن ئێزدی بۆ ناڤەندێن نێڤدەولەتی و جیهانی.
دەقێ پەیاما مەکتەبا ڕێکخستنا پارتی دیموکراتی کوردستان:
گەرمترین پیرۆزباهیان ئاراستەی سەرۆک، دەستەیا کارگێڕی، هەمی ئەندامێن بنگەهی و تەڤایا خوشک و برایێن کوردێن ئێزدی ل کوردستانێ و جیهانێ دکەین.
بنگەهێ لالش ب درێژاهیا کاروانێ خەباتا خۆ یێ 33 ساڵان دا، سەلماندیە کو کەلهەکا بهێز و خۆڕاگرە بۆ پاراستن و گەشەپێدانا چاند و دیرۆکا دێرینا کوردێن ئێزدی، وەک پشکەکا ڕەسەن و جودانەبوویی ژ دیرۆک و ناسنامەیا نەتەوەیا گەلێ کورد.
ئەڤ ناڤەندە نەک بتنێ د وارێ رەوشەنبیری دا پێشەنگ بوویە، بەلکو ڕۆڵەکێ کاریگەر د چەسپاندنا کلتوورێ پێکڤەژیانا ئاشتیانە و تەباییێ ل کوردستانێ گێڕایە و شیایە ببیتە مینبەرەکا ڕاستەقینە بۆ گەهاندنا دەنگێ مەزڵۆمیەت و ئێش و ئازارێن کوردێن ئێزدی ب ناڤەندێن نێڤدەولەتی و جیهانی.
ئەم وەک مەکتەبا ڕێکخستنا پارتی دیموکراتی کوردستان ل بەهدینان، دووبارە ڤێ هەلکەفتێ ل هەوە پیرۆز دکەین، دەستخۆشیێ ل خەباتا هەوە یا پیرۆز دکەین و هیڤیا بەردەوامی و دەستکەفت و سەرکەفتنێن مەزنتر بۆ کار و چالاکیێن هەوە دخوازین، هەر شاد و سەرفەراز بن.
مەکتەبا ڕێکخستنا پارتی دیموکراتی کوردستان ل بەهدینان
11ێ گولانا 2026