ناڤەندا نووچەیان – سەما
نیڤرۆیا ئيرۆ مەسرور بارزانی، سەرۆکێ حکومەتا هەرێما کوردستانێ، ل بەغدا ل گەل عەلی زەیدی، سەرۆکوەزیرێن عێراقا فیدڕال کۆم بوو. د کۆمبوونێ دا هەردوولا ب ههڤڕا بوون ل سەر بهێزكرنا هاریکاری و هەماهەنگیيێ د ناڤبهرا هەردو حکومەتێن فیدڕال و هەرێما کوردستانێ دا، بۆ چارەسەرکرنا کێشەیان و دەربازکرنا ئالۆزییان.
ئيرۆ شەمبوويێ، 23ـی ئهیارا 2026، مەسرور بارزانی، سەرۆکێ حکومەتا هەرێما کوردستانێ، د چارچۆڤێ سەرەدانا خۆ دا بۆ بەغدا، ل گەل عەلی فالح زەیدی، سەرۆکوەزیرێن نوو یێ فیدڕال کۆم بوو.
ل گۆڕەیى ڕاگەهاندنا حکومەتا هەرێما کوردستانێ، د کۆمبوونێ دا، مەسرور بارزانی، سهرۆكێ حكومهتێ دگەل پیرۆزباهییا دەستبکاربوونێ ل سەرۆکوەزیرێن فیدڕال، پشتەڤانییا حکومەتا هەرێما کوردستانێ ژی بۆ سەرخستنا حکومەتەکێ د پێخەمەت خزمەتکرنا گشت پێکهاتە و وەلاتییێن عێراقێ ب بێ جوداهی دوپات کر.
وەکو د ڕاگەهاندنێ دا ئاماژە پێ هاتیيە دان، سەرۆکێ حکومەتێ تهكهزى ل سەر گرنگییا چارەسەرکرنا کێشەیێن دناڤبهرا هەرێما کوردستانێ و حکومەتا فیدڕال دا ب شێوەیەکى بنەڕەتی کر، ل سەر بنەمایێ دەستووری و ڕێزگرتن ل قەوارەیێ فیدڕالی یێ هەرێما کوردستانێ.
سەرۆکوەزیرێن فیدڕال، خۆشحالییا خۆ ب سەرەدانا سەرۆکێ حکومەتێ دهربرى و تهكهزى ل سەر وێ یەکێ کر، ئەم هەموو د ڤی وهلاتی دا ههڤبهشين و ئارمانجا مە چارەسەرکرنا کێشەیان و گەهشتنا ب ڕێککەفتنێ و خزمەتکرنا هەموو وەلاتی و پێکهاتەیانە ب بێ جوداهی.
ههروهسا تهكهزى ل سەر وێ یەکێ ژی هاتە کرن: “هەردوولا ب ههڤڕا بوون ل سەر بهێزكرنا هاریکاری و هەماهەنگیيێ د ناڤبهرا هەردو حکومەتێن فیدڕال و هەرێما کوردستانێ دا، بۆ چارەسەرکرنا کێشەیان و دەربازکرنا ئالۆزییان.”