ناڤەندا نووچەیان – سەما
ل سەر بنەمایێ بەرژەوەندییا گشتی و ژ پێخەمەت کێمکرنا بارگرانییا دارایی ل سەر ملێن گەنجان و مالباتێن دەڤەرێ، ڕیهسپی و گەنجێن هۆزا مالا خالد ل مەزارگەهێ شەرەفەددین ل شنگالێ کۆمبوون و چەند بڕیارێن جڤاکی دەرخستن.
بڕیار ئیرۆ 19ی حوزەیرانا 2026، دێ کەڤنە دبوارێ بجهئینانێ دا و کار پێ ئێتە کرن.
بڕیارێن د کۆمبوونێ دا هاتینە دان:
1- نەختێ کچێ دئێتە دیارکرن ب کوژمێ پێنج ملیۆن دینارێن عێراقی ل ناڤبەرا کوڕ و کچێن هۆزا مالا ئەخالد دا. هەروەسا د حالەتێن هەڤژینییێ دگەل هۆزێن دی دا، دێ ڕێز ل نەریت و تێكەلیێن وان هۆزان ئێتە گرتن ب ڕێککەفتنا د ناڤبەرا هەردوو ئالییان دا.
2- رێککەفتن ل سەر کوژمێ زێڕێ بووکێ د ناڤبەرا کچ و کوڕی بخۆ دا دئێتە کرن ب حەزا وان یا ئازاد، بێی چو دەستێوەردان ژ لایێ مالباتێن وان ڤە.
3- ژنا هەڤژیندار خودان ئازادیا تەمامە د سەرەدەریكرنێ دا ب مووچە یان داهاتێ خۆ یێ تایبەت، و چو ئالییەک یان کەسەک ژ مالباتێ ماف نینە چو ئەرکێن دارایی ل سەر بسەپینت یان داخوازا پشکدارییێ د داهاتێ وێ دا بکەت.
4- د حالەتێن جودابوونێ (تەڵاقدانێ) یێن بێ ئەگەر، ئەو لایەنێ دبتە ئەگەرێ تەلاقدانێ بێی ئەگەرەکی قانوونی، جڤاکی یان لۆژیکی، دێ ئێتە نەچارکرن کو دووبارە بهایێ مارەییا دیارکری وەک سزایەک بدەت، ئەڤ چەندە ژی پشتی پێداچۆن ب بارودۆخێ حالەتی دگەل داب ونەریت و قانوونێن کارپێکری دئێتە کرن.
5-رێورەسمێن (خێر و زادێ مری) دێ ب تنێ ل ڕۆژا سێیێ یا مرنێ ئێنە کرن، ئەڤ چەندە ژی بۆ بەرچاڤگرتنا بارودۆخێ جڤاکی و کێمکرنا بارگرانی و مەزاختییان ل سەر مالباتا خودانێ مرنێ.
6- ئەگەر هەلکەفتەکا شایی و هەڤژینییێ کەفتە د هەمان دەمێ حالەتەکێ مرنێ دا، ماف هەیە بۆ خودانێن شاییێ کو ڕێورەسمێن خۆ ب گێڕن پشتی کو سەرەدان و سەرەخۆشییا خۆ گەهاندینە مالباتا مری و سەرەدانا گۆڕستانێ کرین، ب شێوازەکی کو هەستێن هەموو ئالییان بێنە پاراستن و ڕێگری ل هەر دلگرانى یان تێگەهشتنەکا شاش بێتە گرتن.
7- داخوازنامە و گازیكرن د بیرهاتنا سالانە یا مرنێ دا (سەرسال) دێ ب تنێ بۆ خزم و کەسێن نێزیک بت ل ناڤ کۆمەلگەهێ یان گوندی، دوور ژ ئیسراف و مەزاختییێا زێدە و نە پێدڤی.
8- ئەگەر هەر کەسەک ژ هۆزێ تووشی نەخۆشییەکێ، یان ڕوودانەکێ، یان هەر بارودۆخەکێ مرۆڤایەتی یێ نائاسایی بوو، دەرگەهێ بەخشین و هاریکاریێن خێرخوازی دێ ئێتە ڤەکرن بۆ پشتەڤانیکردنا وێ مالباتا زیاندار دا هاریکارییا وان بکەن.
9- دەمێ هەر کەسەک حەزکەت ئەردەکێ خۆ یێ کو دکەڤتە د ناڤ سنوورێ ئەردێن هۆزێ دا بفرۆشت، پێدڤیە ل سەر تۆرێن جڤاکی رابگەهینت و ب فەرمی موختار و سەرۆکێ هۆزێ ئاگەهدار بکەت. هەروەسا چو کڕیارا ماف نینە داخوازا مافێ پێشینەیی ل سەر ئەردێن جیران بکەت ب بەهانا هندێ کو ئەو بوویە خودانێ ئەردێ کڕی.