ناڤەندا نووچەیان – سەما
وەزارەتا ئەوقاف و کاروبارێن ئایینی یا حکومەتا هەرێما کوردستانێ، پێشڤهبرن و نووژەنکرنا سیستەمێ سندۆقا سکالایان ڕاگەهاند. ژ لایێ خۆ ڤە، بەرپرسێ ڕاگەهاندنا وەزارەتا ئەوقاف و کاروبارێن ئایینی یا هەرێما کوردستانێ ئاماژە ب وێ چەندێ کر کو ئەڤ پێنگاڤە ب ئارمانجا گوهلێبوونا بترە ژ پێشنیار و کێشەیێن وەلاتیيان و پشتڕاستبوون ژ چارەسەرکرنا وان.
رۆژگار جەعفەر، بەرپرسێ ڕاگەهاندنا وەزارەتا ئەوقاف و کاروبارێن ئایینی یا هەرێما کوردستانێ تایبەت بۆ مالپەرێ (کوردستان٢٤) ڕاگەهاند؛ وەلاتی دكارن ب سێ ڕێیێن جیاواز سکالا و پێشنیارێن خۆ بگەهینن:، ڕاستەوخۆ ب ڕێیا فۆڕمێن د ناڤ سندوقان دا ل ڕێڤەبەریيان، ب ڕێیا ئیمەیلێ تایبەت یێ وەزارەتێ، و ب ڕێیا وان هەردوو ژمارەیێن تەلەفۆنێ یێن بۆ ڤێ مەرەمێ هاتینە تەرخانکرن.
د ناڤ وەزارەتا ئەوقافێ دا بەشێ سکالایان هاتیيە پێکئینان کو ڕۆژانە و هەفتیانە سەرپەرشتیيا سکالایان دکەت. پرۆسە ب ڤی شێوەیی یە کو سکالا ب نڤیسارەکا فەرمی ئاڕاستەی بەشێن پەیوەندیدار دئێنە کرن بۆ بەرسڤدانێ. بەرپرسێ ڕاگەهاندنا وەزارەتا ئەوقاف و کاروبارێن ئایینی پشتراستييێ ددەتە وەلاتیان کو “چ سکالا نائێنە پشتگوهـ خستن” و هەموو دئێنە تۆمارکرن.
سەبارەت وێ چەندێ کا سکالا ل کووڤە دئێنە چارەسەرکرن، ڕۆژگار جەعفەر ڕاگەهاند: “ل دەستپێکێ ڕێڤەبەريیێن گشتی یێن ئەوقافێ ل پارێزگەهان (وەک سلێمانی، دهۆک، گەرمیان و هتد) بزاڤا چارەسەرکرنا وێ ددەن، ئەگەر ل وێدهرێ چارەسەر نەبوو، دێ زڤرتە بۆ بەشێ سکالایان د ناڤ دیوانا وەزارەتێ دا داکو ل وێدهرێ بڕیارا داوييێ ل سەر بێتە دان.”
ئێک ژ خالێن گرنگ یێن ڤی سیستەمی ئەوە کو بتنێ بۆ ئایینەکێ دیاریکری نینە. بەرپرسێ ڕاگەهاندنا وەزارەتا ئەوقاف و کاروبارێن ئایینی دوپاتكر کر کو سندۆقا سکالایان هەموو ئایین و ئایینزایێن کوردستانێ (مەسیحی، ئێزدی، کاکەیی و هتد) بخۆ ڤە دگرت. بۆ نموونە، هەر سکالایەکا مەسیحیيان ل عەنکاوە، کۆیە یان هەر جهەکێ دی هەبت، وەزارەت دێ گههینتە ڕێڤەبەریيا گشتی یا کاروبارێن مەسیحیيان بۆ بەرسڤدانێ.
ئەڤ پێنگاڤا وەزارەتا ئەوقافێ وەک بزاڤەکێ دئێتە دیتن بۆ شەفافیەتێ و ئاواکرنا پرەکا پەیوەندیێ یا ڕاستەوخۆ د ناڤبەرا وەلاتیيان و دامەزراوەیێن ئایینی یێن هەرێما کوردستانێ دا بێی چ جیاوازی.