ناڤەندا نووچەیان – سەما
گهنجهكێ ئێزدى ئەپلیکەیشنهكێ تایبەت ب خزمهتگۆزارييان ڤه ب ناڤێ “ڕێبهرێ شنگال” دورست كر.
بەرزان داود ئەلهەبابی، پشتى ژ بهشێ تەکنۆلۆژیایا پێزانینان (IT) ل زانکۆیا هەولێرێ ب داوی ئینايى، هزرا دورستکرنا ئەپلیکەیشنهكى بۆ كۆمكرنا خزمەتگۆزاریبان ل باکور و باشورێ چیایێ شنگالێ بكهت و گەهشتنا وەلاتیيان بۆ ڤان خزمەتگۆزاریيان ب ساناهی بکەت.
ئهو گهنجێ داهێنهر بۆ سهما دياركر، بيرۆكهيا ئەپلیکەیشنێ ژ ناڤ ئازار و ئاریشێن ڕۆژانە یێن خەلکێ دەڤەرێ هاتە پێش، دەما من دیتی کو وەلاتی ب زەحمەت دکارن نۆشدار، دەرمانخانە، پیشە، و جهێن بازرگانی و خزمەتگۆزاریيێ ببینن. ژ بەر هندێ، بزاڤ كر ڕێبهرهكێ دیجیتالی یێ تەمام ئاڤا بکەت کو شیانا گەڕیانێ ل سەر ئاستێ گوند و دەڤەران دابین بکەت، دا کو دەم و ماندیبوونا خەلکی کێم بکەت. ئەڤ چەندە د هەمان دەم دا پشتەڤانیيێ ل خودان پرۆژەیێن خوهجهی دکەت و هاندانا گۆڕانکاریيا دیجیتالی ل دەڤەرێ دکەت، دگەل بەردەوامبوونا کار ل سەر گەشەپێدانا وێ دا ببتە سەکۆیەكا تەمام کو پێدڤیاتیيێن جڤاکی دابین بکەت.
ههروهسا رۆنكر، “ئەپلیکەیشنا ڕێبهرێ شنگال کۆمەکا بەرفرەهـ ژ خزمەتگۆزاریيان ب خۆڤە دگرت، ژوان: نۆشدار، کۆمەلگەهێن پزیشکی، دەرمانخانە و تاقیگەهـ، دگەل نیشاندانا ڕۆژێن دەوامێ، ژمارەیێن پەیوەندیيێ و جهێ وان ل سەر نەخشەیی. پێخەمەت ڤێ چەندێ، پێزانینێن دکان، بازار، وەرشه، کارگەهـ، خزمەتگۆزاریيێن ترۆمبێلان، چێشتخانە، کافى و سالۆنێن جوانکاریيێ، زێدەباری چەندین خزمەتگۆزاريیێن گشتی و پیشەیی یێن جودا تێدا هەنە. هەروەسا ئەپلیکەیشن ڕێ ددەتە خودان کاران کو پێزانینێن پرۆژەیێن خۆ ب ڕێکا واتسئاپێ یان ئیمەیلی بهنێرن، دا کو پشتی پێداچۆنێ، ل سەر ڕێبهرى بێنە زێدەکرن.”
ئهو گهنجه پەیامەکێ ڕابهرى گەنج و دەرچۆیێن زانکۆیان ل شنگالێ دکەت و داخوازێ ژوان دکەت کو چاڤەڕێی دەلیڤەیێن دامەزراندنێ نەبن، بەلکو دەمێ خۆ بۆ فێربوونا تەکنۆلۆژیایێ تەرخان بکەن، وەک: ئاسایشا سایبەر (Cybersecurity)، پرۆگرامسازیا سایتان، گەشەپێدانا ئەپێن مۆبایل و کۆمپیۆتەران، پەرەپێدانا یاریان، و مفا وەرگرتن ژ تەکنیکێن ژیرییا دەستکرد (AI). ئەو جەختێ ل سەر هندێ دکەت کو سەرکەفتن ژ بیرۆکەکا سادە دەست پێ دکەت.