دهۆك: سالیادا كۆمكۆژییا كۆچۆ و گرعزێر و سیپاشێخدرێ هاته‌ ساخكرن

ناڤه‌ندا نووچه‌يان – سه‌ما

ئيرۆ ڕۆژا پێنجشه‌مبێ 13ـى ته‌باخا 2026، ل هۆلا ده‌سته‌یا بنگه‌هێ لالش یێ ڕه‌وشه‌نبیری و كۆمه‌ڵایه‌تی ب ئاماده‌بوونا د.عه‌لی ته‌ته‌ر، پارێزگارێ دهۆكێ و میر حازم ته‌حسین به‌گ، میرێ ئێزدیان و هژماره‌كا كه‌سایه‌تییێن ئۆلی، جڤاكی و كه‌سوكارێن شه‌هیدان، ڕێوڕه‌سمێن سالڤه‌گه‌ڕا 19ێ یا كۆمكوژييا گرعزێر و سیپاشێخدرێ و سالڤه‌گه‌را 12ێ یا كۆمكوژيیا كۆچۆ هاتنه‌ گێڕان.

پارێزگارێ دهۆكێ د په‌یڤه‌كێ دا به‌حس ل دیرۆكا گه‌لێ كورد و ئه‌و جینۆساید و زولم و زۆردارییێن ب سه‌ردا هاتین، هه‌روه‌سا زنجیره‌ تاوانێن ئێك لدووڤ ئێك هه‌تا یێن ڤێ داويیێ ب ده‌ستێن تیرۆرستێن داعش ل دژی هه‌موو پێكهاته‌یان كر و خواست هه‌موو پێكهاتێن ئاینی و نه‌ته‌وه‌یی د ئێكگرتی و كوردستانی بن ب تایبه‌ت گه‌نجێن كورد بێ جوداهی هه‌ست ب به‌رپرسایه‌تیيا پاراستنا ئاخ و ئالا و پیرۆزییێن كوردستانێ و پاراستنا پێگه‌هێ پێكڤه‌ژیانێ بكه‌ن.