ناڤەندا نووچەیان – سەما
ئيرۆ پێنجشەمبێ، 10ـى ئەیلوولا 2026، رێبەر ئەحمەد، وەزیرێ ناڤخۆیێ حکومەتا هەرێما کوردستانێ، د لێدوانەکا ڕۆژنامەڤانی دا تیشک ئێخستە سەر چەندین پرسێن هەستیار ل ناڤبەرا هەولێر و بەغدا، ژ وان ژی بجهئينانا ڕێککەڤتنامهيا شنگالێ.
وەزیرێ ناڤخۆ بهحس ل رهوشا ئالۆز یا قەزا شنگالێ کر و ڕاگەهاند، ڕێککەڤتنامهيا شنگالێ باشترین چارەسەرییە بۆ كێشهيێن وێ دەڤەرێ. داخوازی ژی ژ دامەزراوەیێن حکومەتا فیدڕال کر کو پێنگاڤێن بلهز و کريار بهاڤێژن بۆ بجهئينانا خالێن رێککەڤتنێ.
رێبەر ئەحمەد گۆت: “ئەوا بۆ مە گرنگ، ناڤونیشانێن ڕێککەڤتنێ نینە، بەلکو بجهئينانا وان بڕگايه ئەوێن ڕێککەڤتن ل سەر هاتيیە کرن؛ ژ وان ژی ئاساییکرنا ڕهوشێ، ڤهگهڕيانا سەقامگیریيێ، دوورخستنا هێزێن چەکدار ژ ناڤ باژێڕی، ڕادەستکرنا ئەرکێ ئەمنی بۆ پۆلیسێن ناڤخۆیی، هەروەسا دانانا قایمقامەکێ نوو و پێشکێشکرنا خزمەتگۆزارییان.”
وەزیرێ ناڤخۆ ب توندی ل دژی دانانا قایمقامەکێ سەربازی سهكنى و ب “خراپترین بژاردە” وەسف کر. تهكهز ژی کر، دڤێت چارەسەری ب ڕێیا ڕێککەڤتنەکا سیاسی و کارگێڕی بت ل گەل جڤاتا پارێزگەها نەینەوا، پارێزگارێ نەینەوا و ئالييێن سیاسی، دا کو رێڤهبهرييهكا نوو بێتە پێکئینان کو خزمەتگۆزاریيان و ئاڤەدانیيێ ڤهگهڕينته ڤه بۆ شنگالێ.