ناڤەندا نووچەیان – سەما
د شێست و پێنجەهەمین سالڤەگەڕا دەستپێکرنا شۆڕەشا مەزن یا ئەیلوولێ دا، سەرۆک بارزانی پەیامەک بەلاڤکر و ڕاگەهاند، شۆڕەشا ئەیلوولێ ل ژێر ڕابەرایەتییا بارزانیێ نەمردا، بوو ژێدەرێ هێزێ و ئیلهامبەخش بۆ قۆناغێن دی یێن خەباتێ ل سەرجەم پارچەیێ کوردستانێ دا.
دەقێ پەیاما سەرۆک بارزانی:
ئەڤرۆ 65سال ب سەر دەستپێکرنا شۆرەشا مەزنا ئەیلوولێدا دەرباز دبن؛ شۆرەشەکا سەرتاسەری کو تێدا پێشمەرگە، سیاسی، ڕێکخستن، زانایێن ئایینی، مامۆستا، ئەدیب، ڕۆشنبیر، گەنج، ئافرەت و هەموو تەخ و توێژێن جڤاکی پشکداری د خەباتا نەتەوەیی و دیموکراتیخوازیا گەلێ خۆ دا کر.
شۆرەشا ئەیلوولێ سەرهلدانا ئیرادە، باوەریپێبوون و سەربلندییا مرۆڤێ کوردستانی بوو؛ بناغەکێ قایم و ڕێکخستی بوو بۆ بەردەوامییا تێکۆشانێ و ڕاوەستیانا گەلێ کوردستانێ ل بەرامبەر زۆرداریێ. ڤێ شۆرەشا مەزن، ب بەهایێن خۆ ئێن بلند و ب پێداگیری و خۆڕاگرییا بێوێنە یا سەرکردایەتیێ، پێشمەرگەی و جەماوەری، دۆزا ڕەوا یا گەلێ مە ب پێنگاڤێن مەزن بەرەڤ پێش بر. شۆرەشا ئەیلوولێ ل ژێر ڕابەرایەتییا بارزانیێ نەمر، بوو ژێدەرێ هێزێ و ئیلهامبەخش بۆ قۆناغێن دی یێن خەباتا ڕزگاریخوازیا گەلێ مە و خەباتکارێن کورد ل تەڤایا پارچەیێن دی یێن کوردستانێدا.
د 65 سالییا ڤێ شۆرەشا سەربلند، پێزانینێن خۆ بۆ ڕۆلێ دیرۆکییێ تەڤایا وان پێشمەرگە و خەباتکارێن قارەمان دووپات دکەم کو پشکداری د تۆمارکرنا ڤێ سەروەریا نیشتمانیدا کری؛ چ ئەو شەهیدێن نەمر یێن د شۆرەشا ئەیلوولێ دا گیانێ خۆ بۆ ڤێ ئاخا نیشتمانی کریە قوربان و ئەوێن د ژیانێدا نەماین، چ ئەوێن سەربلندێن کو هەتا نوکە ژی وەکی شاهدحالێن زیندی یێن دیرۆکی د ژیانێدا ماین. قارەمانێن دروستکرنا سەروەریێ بوون بۆ گەلێ خۆ و جهێ شانازیێ نە.
مسعود بارزانی
11ی ئەیلوولێ 2026