ناڤەندا نووچەیان – سەما
د پێنگاڤهكا كريار دا بۆ بدهستڤهئينانا دادپهروهرييێ و قهرهبووكرنا قوربانييێن جينۆسايدێ و تاوانێن نێڤدهولهتى، جڤاتا وهزيرێن عێراقێ ب ڕهزامهنديا سهرۆك وهزيران، د چارچۆڤێ ڕهشنڤيسێ ياسايا تاوانێن نێڤدهولهتى بڕيار ل سهر دامهزراندنا سندوقهكا تايبهت بۆ قهرهبووكرنا قوربانييان پهسهند كر.
ب گۆڕهيى ڕاگههاندنهكا د. خهلهف سنجارى، شێوهرمهندێ سهرۆكێ حكومهتا عێراقێ بۆ كاروبارێن ئێزدييان، د چارچۆڤێ ڕهشنڤيسێ پروژهياسايا تاوانێن نێڤدهولهتى، تاوانێن جينۆسايدێ و تاوانێن دژى مروڤاتييێ، جڤاتا وهزيران بڕيار ل سهر دو خالێن سهرهكى دايه:
ئێك: دامهزراندنا سندۆقهكێ ب ناڤێ “سندۆقا قهرهبووكرنا قوربانييێن تاوانێن نێڤدهولهتى” ل سهر ئاستێ فهرمانگههێ (ل ژێر ئاستێ ب ڕێڤهبهرييا گشتى)، كو دێ كهساتييا مهعنهوى و سهربهخۆييا دارايى و كارگێڕى ههبت. بودجهيا ڤێ سندۆقێ دێ ب ڕێيا وان بهخشين و هاريكارييان ئێتە دابينكرن ئهوێن ژ ئالييێ وهلاتان، ڕێكخراو و دهستهيێن نێڤدهولهتى و ههرێمى ڤه تێنه پێشكێشكرن، ههڤدهم ب وى كوژمێ دراڤى و قهرهبوويێن دهولهتا عێراقێ ب ڕێيا سكالا و داخوازيێن دادوهرى یێن پهيوهنديدار ب تاوانێن نێڤدهولهتى ڤه ب دهستخۆڤه دئينت.
دو: ئهركێن ڤێ سندۆقێ، لايهنێ پهيوهستبوونێ، پێكهاتێن كارگێڕى، ميكانيزما ب ڕێڤهبرنێ، دهرگههێن مهزاختنێ و تهڤايا پرسێن پهيوهنديدار ب كاركرنا وێ ڤه، ب گۆڕهيى پهيڕهوهكێ دێ ئێنه دياركرن كو پاشى ژ ئالييێ جڤاتا وهزيران ڤه دێ دهركهڤت.
ئهڤ بڕياره وهك گاڤهكا گرنگ و پێدڤى تێته هژمارتن بۆ چهسپاندنا دادپهروهرييێ، پاراستنا مافێن قوربانييان و قهرهبووكرنا زيانڤێكهڤتييێن تاوانێن نێڤدهولهتى، ب تايبهتى قوربانييێن كۆمكوژى و جينۆسايدا ئێزدييان و ههموو تاوانێن دژى مرۆڤاتييێ.