ناڤەندا نووچەیان – سەما
پشتی بەلاڤبوونا کۆمێنتەکا پەرلەمانتارێ عێراقێ “مستەفا سەنەد” بەرامبەر ئێزدییان ل شنگالێ، پێلەکا نەڕازیبوونێ یا مەزن ل ناڤ جادەیا ئێزدییان دا پەیدابوو. د ڤی چارچۆڤەیی دا، نوونەرێ کۆتایا ئێزدییان ل پەرلەمانێ عێراقێ ب توندی بەرسڤا وی دا و ڕەفتارا وی ب “سفکاتی” ب قوربانیێن ئێزدییان ناڤ کر.
چ روودا؟
دەسپێکا کێشەیێ ل وێدەرێ بوو دەما گەنجەکێ ئێزدی ل سەر پۆستەکێ تۆڕێن جڤاکی کۆمێنتەک بۆ “مستەفا سەنەد”، سەرۆکێ فراکسیۆنا (ابشر یا عراق) نڤیسیبوو. سەنەدی ژی ب شێوەیەکێ بریندارکەر بەرسڤا وی دابوو و گۆتبوو: “تۆ یێ شنگالی، دبت تو بەری نۆکە یێ دەستەسەرکری (سبایە) بای.”
ئەڤ بەرسڤە دناڤ ئێزدیان دا وەک ئاگری بەلاڤ بوو و ب سفکاتیکرن ب ئێش و ئازارێن جینۆسایدا ئێزدییان و هەروەسا وەک هزرەکا توندڕەوانە هاتە دیتن.
هەلوەستێ فەرمی یێ نوونەرێن ئێزدییان
دەربارەی ڤی بابەتی، خالد سەیدۆ عزیر، نوونەرێ کۆتایا ئێزدییان ل پەرلەمانێ عێراقێ، بەیاننامەیەکا توند بەلاڤ کر و گۆت: ب توندترین شێوە سفکاتیکرنا مستەفا سەنەدی شەرمزار دکەین؛ ئەڤە پێشێلکرنا دەستووری و بێڕێزییە بەرامبەر کەرامەتا پێکهاتەیەکێ ڕەسەن یێ عێراقێ.
خالد سەیدۆ تەکەز کر، دڤێت ب زووترین دەم لێبۆرینەکا فەرمی و ئاشکرا ئاراستەی هەموو ئێزدییان بێتە کرن و دیارکر، ئەم دێ مافێ خۆ یێ یاسایی ب کار ئینین و ڤی بابەتی بەینە بەرامبەر دادگەهێن تایبەتمەند بۆ سزادانا هەر کەسەکێ سنوورێن خۆ ببەزینت.
”کەرامەتا ئێزدییان هێلا سۆرە”
خالد سەیدۆ عزیر د بەیاننامەیا خۆ دا تەکەزی ل سەر وێ چەندێ کر: “کەرامەتا ئێزدییان هێلا سۆرە و ب چ ڕەنگان قەبوول ناکەین ئەڤ سنوور بێنە بەزاندن.”
ئەڤ ئالۆزییە د دەمەکێ دایە کو جادەیا ئێزدییان هێشتا چاڤەڕێی دادپەروەریێ و ساڕێژکرنا برینێن خۆ دکەن، نەک برینێن وان ب گۆتنێن ب ڤی ڕەنگی ژ لایێ پەرلەمانتاران ڤە بێنە کولاندن.