بێگومان ئاخا پیرۆزا شنگال هەموو دەما نیشانا مەردەمێر و عەگیدان بوویە و شەنگستا هەبوونا ئێزیدخانەکا ئازا و ماکا کەلتوور و زمانێ شرین یێ کوردی بوویە و جڤاکێ وێ ب هەموو پێکهاتەیێن خۆ ڤە وەکو چەپەرەکی ب هێز یێ بەرخۆدانێ بۆ بەرگریكرن ژ ناسناما خۆ یا کوردەواریێ د ئامادەبووینە، زێدەباری ئەڤێ چەندێ ژی بلنداهیا چیایێ وێ یێ خۆراگر کەلها ئەوان خۆشمێر و فێرسێن ناڤدار یین کوردستانێ بوویە کو هەردەم دەستبەردایی نشتیمان و نەتەوەیا خۆ یا رەسەن نەبووینە.
ل درێژیا دیرۆکا جڤاکێ ئێزدی و سەرەرایی هەولێن قرکرن و ئەوان هەموو فەرمانێن گران یێن کو ب سەرێ وان هاتین شنگال و هیچ دەڤەرەکا دی یا ئێزدیا نەبووینە ئالاڤ و کەرستەیەکی کرین و فرۆتنێ ل بەردەستێ بازرگانێن سیاسەتێ ئەوێن دهێنە هاندان ژلایێ دوژمنێ نەتەوەیا کورد و نەحەزێن گەلێ کوردستانێ ڤە.
خەلکێ شنگالێ هیچ دەمەکی زۆرداریا دوژمنان ل سەر ئاخا خۆ یا پیرۆز قەبوولنەکریە و ناسناما خۆ یا نەتەوەیی یا رەسەن نەگوهەرینە، هەر دیسا ل دەمێ دەستهەلاتێ بەعسیان ژی کو دژوارترین رژێما سەپینەر بوو ل سەر گەلێن عیراقێ هەلویستێ وان یێ مکوم ل سەر کوردبوونا خەلکێ شنگالێ نەهاتیە گوهرین و رێک نەداینە نەیاران دەست ب سەر ئاخا وێ یا پیرۆز دا بگرن، سەرەرایی هەموو هەولێن عەرەبكرن و گوهرینا دیمۆگرافیا دەڤەرێ، و پێخەمەت ئەڤێ چەندێ رویبارێن خوینێ رژاندینە و دەستبەردایی ئاخ و ئۆل و نەتەوەیا خۆ نەبووینە.
دیسان هەر ل سەردەمێ دامەزراندنا عیراقێ وەکو وەلات، خەلکێ شنگالێ خۆ ژ نەتەوەیا خۆ یا کوردی دویرنەکریە و بەردەوام شانازی ب کوردستانیەتا دەڤەرێن خۆ کرینە و دناڤ هەموو شۆرەش و بەرخۆدانێن مللەتێ کورد دا چەکێ شەرەفێ هلگرتینە و بەرەڤانی ژ ئاخا پیرۆزا کوردستانێ کرینە و پێخەمەت ئازادیا وەلاتێ خۆ قوربانی داینە، هەروەسا د پرۆسیسا ریفراندۆمێ دا ب رێژەیەکا بلند دەنگ ل سەر دەولەتەکا سەربخۆ بۆ گەلێ کوردستانێ دایبە، و هەر ب دلسۆزی د بەردەوام بووینە ل سەر ب دەستڤەئینانا مافێ مللەتێ خۆ یێ کورد.
هەر وەسا ل دەمێ هێرشا هۆڤانە یا رێکخراوا تیرۆرستی یا داعش کو ب هەڤکاریا وەلاتێن بیانی و هێزؽن مەزن یین ناڤدەولەتی بۆ سەر دەڤەرا شنگالێ کو پیلانەکا ڤەسترایی یا پێشوەختبوو و ئەگەر ژێ نەهێلانا ئۆلا پیرۆزا ئێزدیێن وێ دەڤەرێ و پێگیری ب نەتەوەیا وان یا کوردی یا رەسن بووینە، لەوا هەموو پیرۆزیین جڤاکێ ئێزدی کرنە ئارمانج و دەست ب سەر مال وملکێن وان دا گرتن و ژمارەکا زۆر ژێ ژناڤبرن و یێن دی ژی دەربەدەرکرن.
کوردستانیەتا شنگالێ نە پۆستەکی حکوومیە هەتا کو دناڤبەرا چەند کەس و لایەنەکا دا دانوستاندن ل سەر بهێتەکرن و هەڤرکیێ لسەر چارەنڤیسێ وێ بکەن، بەلکو دیرۆکا مللەتەکی کەڤنار و ئۆلەکا رەسن و خودان بیروباوەرێن نەلڤە، کو زۆر جاران دوژمنێ گەلێ کوردستانێ هەولێن ب هێز داینە ب رێکا قرکرنێ و فەرمانا خەلکێ شنگالێ خۆ رادەستی وان بکەن، بەلێ ب خۆراگری ئەوان بەرگری ژ هەبوونا خۆ کریە، لەوا چەند کەسێن نەفام و دویر ژ کەتوارێ جڤاکێ ئێزدی و شنگالی دخوازن ب ئاسانی خۆ رادەستی هزرو بیرێن کەسانێن نەژادپەرێس و نەیارێن گەلێ کوردستانێ بکەن و شنگالێ رادەستی نەحەزێن وێ بکەن.
هەر ژبەر ئەڤێ چەندێ ئەم داخوازێ ژ ئەوان کەسێن نوو بووینە شاگردێن سیاسەتێ، گەل و نەتەوەیا خۆ یا رەسن ژ بیرنەکەن و نەفرۆشنە دوژمنی و بلەز ل خۆ ڤەگەرن و هەولبدەن دگەل کەسێن دلسۆز و خەمخۆرێن شنگال و کوردستانێ کار ژ بۆ شنگالەکا ئارام د چارچۆڤەیێ کوردستانەکا ئازاد دا بکەن.
