ناڤه‌ندا نووچه‌يان – سه‌ما
وەزیرێ ناڤخۆ یێ حكومه‌تا هەرێما کوردستانێ، دلگرانييا خۆ ژ نه بجهئينانا رێککەفتنا شنگالێ یا سالا 2020 نیشان ددەت و راگەهاند، دەمێ وێ یە داوى ب ئێش و ئازارێن خەلکێ قەزایێ بێت و دەڤەر بێتە ئاڤەدانکرن و سەقامگیری بۆ بێتە ڤەگەڕاندن.
دوهى شەمبی، 24ـی چريا ئێكێ 2026، رێبەر ئەحمەد، وەزیرێ ناڤخۆ یێ حکومەتا هەرێما کوردستانێ، د داخويانييه‌كا رۆژنامەڤانی دا تیشک خستە سەر رەوشا نوها یا شنگالێ، پرۆسەیا ڤەگەڕيانا ئاوارەیان و قوربانیدانا هێزێن پێشمەرگەی د شەڕێ دژی تیرۆرستێن داعشێ دا.
رێبەر ئەحمەد، وەزیرێ ناڤخۆ یێ حکومەتا هەرێما کوردستانێ راگه‌هاند: پشتی داگیرکرنا بەشەکێ ژ ئاکا عێراقێ ژ لایێ تیرۆرستێن داعشێ ڤە، ژمارەکا مەزن ژ وه‌لاتییێن وێ دەڤەرێ پەنا بۆ هەرێما کوردستانێ ئینان، لێ پشتی تێکشکاندنا داعش، بەشەک ژ وان ئاوارەیان ب شێوەیەکێ پلەبەندی ڤەگەڕیانه سەر زێدێ خۆ.
دووپات ژى کر، هەرێما کوردستانێ وەک هەردەم بەردەوام بت ل سەر دابینکرنا پەناگەهەکا ئارام و سەقامگیر بۆ هەر کەسەکێ پێدڤی ب هاریکارييێ هەبت.
وەزیرێ ناڤخۆ گۆت: پشتی 100 رۆژان ژ دوورپێچكرن و داگیرکرنا شنگالێ، پێشمەرگەیێ کوردستانێ ب رێبه‌رييا سەرۆک بارزانی كارين شنگالێ ئازاد بکەن، و هەر ل سەر چیایێ شنگالێ ژی سەرۆک بارزانی پەیاما ئاشتی، ئازادی و ئارامیيێ ڕابه‌رى هەموو پێکهاتەیان کر.
هه‌ڤده‌م گۆتژی: د وێ پێناڤێ ژی دا بتر ژ 500 پێشمەرگەيان شەهیدبوون و 3000ـی پێشمەرگەیێن دی ژی بریندار بوون.
هه‌روه‌سا وەزیرێ ناڤخۆ ب پێدڤی زانی هەموو ئەو ئاستەنگ نه‌مينن یێن ل بەر بەردەم ڤەگەڕيانا خەلکێ شنگالێ بۆ سەر مال و حالێن خۆ، ديسان ته‌كه‌زى ل سەر گرنگییا بێهزکرنا برایەتی و پێکڤەژیانا ناڤبەرا کورد و عەرەب و هەموو پێکهاتەیێن نەینەوا کر.
رێبەر ئەحمەد دلگرانييا خۆ دیار کر کو سەرەڕای ده‌ربازبوونا چەند سالان، هێش رێککەفتنا ئاساییکرنا رەوشا شنگالێ نه‌هاتييه بجهئينان، یا کو د سالا 2020 دا ناڤبەرا حکومەتا هەرێما کوردستانێ و حکومەتا فیدڕال دا هاتييه ئيمزاکرن.
وەزیرێ ناڤخۆیێ هەرێمێ ئاشکرا کر، نوها پێشکەفتنەکا بەرچاڤ د دانوستاندنان دا هەیە ب ئاراستەيا دەستنیشانکرنا قایمقامەکێ نوو بۆ قەزایا شنگالێ، دا کو ب وێ رێيێ دەست ب ئاڤەدانکرنێ بێتە کرن و زەمینەيا ڤەگەڕيانا شەرەفمەندانە ئاوارەیان خۆش بت؛ هەروه‌سا هیڤى ژی خواست حکومەتا فیدڕال پێنگاڤێن ب کریار بۆ سەرخستنا ڤێ پرۆسەیێ بكه‌ت.
قەزایا شنگال ئێکه ژ وان جهێن کو داعش د 3ـی تەباخا 2014 ئێرش کرە سەر دەڤەرێ و ژمارەکا مەزن يا خەلکێ کوشتن و هندەک ژی هەتا نوها بێسەروشوونن و کەسوکارێن وان ژی نوها ل کەمپێن پارێزگەها دهۆکێ ژیانێ دەرباز دکەن و ژ بەر نەبوونا ئاسایيش و سەقامگیری و خزمەتگۆزارییان ل ناڤ دەڤەرێ، نكارن ڤەگەڕنه سەر زێدێ خۆ.