ناڤەندا نووچەیان – سەما
وەزیرێ پەروەردەیێ یێ حکومەتا هەرێما کوردستانێ و رێڤەبەرێ گشتی یێ کاروبارێن ئێزدییان کۆمبوون، رەوشا کەرتێ پەروەردەیێ و کێشە و پێدڤییێن خووندنێ ل دەڤەرێن ئێزدییان بەحس کرن.
سێشەمبێ10ی چریا دویێ 2026، د. ئالان حەمە سەعید، وەزیرێ پەروەردەیێ یێ حکومەتا هەرێما کوردستانێ، پێشوازی ل سعود مستۆ، رێڤەبەرێ گشتی یێ کاروبارێن ئێزدیان کر.
راگەهاندنا رێڤەبەرییا گشتی یا کاروبارێن ئێزدییان بەلاڤکر، ل دەستپێکا کۆمبوونێ، سعود مستۆ، رێڤەبەرێ گشتی یێ کاروبارێن ئێزدیان دەستخۆشی ل وەزیرێ پەروەردەیێ و وەزارەتا پەروەردەیێ کر بۆ وێ گرنگیدان و ئاوڕدانا بەردەوام یا وان ب کەرتێ پەروەردەیێ ل دەڤەرێن ئێزدییان.
ژ ئالیەکێ دیڤە، سعود مستۆ، کۆمەکا داخوازی و پێشنیازێن مامۆستا و سەرپەرشتێن بابەتێ ئێزدیاتیێ، کو بەری نهۆ گەهاندبوونە رێڤەبەرییێ، ئاڕاستەی وەزیرێ پەروەردەیێ کرن. ژ وان داخوازییان، پێداچۆن د ئەزموونان دا بێتە کرن دا کو هەڤدەم نەبن دگەل هەردو جەژنێن ئۆلی یێن (رۆژییێن ئێزی و سەرێ سالێ)، زێدەباری چاپکرنا پەرتووکێن ئێزدیاتیێ د پرۆگرامێ خواندنێ دا، و دانانا گرنگییەکا بتر ب دیرۆکا دەڤەرێن ئێزدیان و کەسایەتییێن دیار یێن دیرۆکی.
هەروەسا سعود مستۆ خواست کو زێدەتر گرنگی ب پاشخانا پەروەردەیی یا دەڤەرێن ئێزدیان و ب تایبەتی قەزا شنگالێ و خواندنا زمانێ کوردی بێتە دان.