15ساڵ بسه‌ر وه‌غه‌ركرنا هۆنەرمەندێ نەمر”خدرفەقیر”ده‌رباز دبن
سه‌ما
كەوێ چیایێ شنگالێ و قوتابیێ قوتابخانا شێخ مووس یا سترانا فلكلۆری و ئاشقێ هەر چاغەكی ژ عەمرێ خۆ و خودانێ دەنگەكی زەلال و كێم هەی،ئاشقێ سترانا عەیشا بالێ، ئەوێ چ دەما ئەم گوهـ ل پەیڤا سترانا شنگال دبن دەنگێ وی پێشی د ئێتە هزرا مە، خدر فەقیر سترانبێژەكێ مەزنێ چیایێ شنگالێ، ناڤێ وی یێ دروست(خدر كورێ خودێدا كورێ كەچەل كورێ برۆ كورێ ئۆمەرە)، ناڤێ داکا وی ژی (عەدول براهیم) ـە، ناڤهاتی ژ بنەمالا زەرۆ یە ژ هۆزا فەقیرا یە، ل سالا(1950)ێ ل گوندێ (سمێ هێستر) سەر ب ناوچەداریا كەرسێ یا وی دەمی ڤە د ناڤا چیایێ شنگالێ دە چاڤێ خوە ژ دنیایێ رە ڤەکرنە و پاشی بنەمالا وان ل ل گوندێن ملک و بەرانا و ل داویێ ژی ل کۆمەلگەها بۆرک یا شەمالی چیایێ شنگال بجهـ دبن.
خدر فەقیر دناڤبەرا سالێن(1973و 1974)ێ دگەل (غەزال دەروێش) ژیانا هەڤژینیێ پێكئینایە و بوونە دەیك و بابێن یازدە زارۆكان ئەو ژی بناڤێن (عەلی،مەیان،تەحسین،ئیسماعیل،سعید،خێری،هەدیا،ناسر،دلڤین،دلخواز،روكەن)،خدر فەقیر لسەر دەستێ بابێ خۆ فێری سترانێ بوویە چونکی بابێ وی ژی ستران د گۆتن و هەروەسان گەلەك ستران ژ زاردەڤێ سترانبێژ شێخ مووس شێخ سلۆ وەرگرتنە و ئەو ژێرە بوویە مامۆستا ژبۆ گۆتنا سترانا فلكلۆری یا چیایێ شنگالێ و پاشی ب بەرفرەهی دکەڤتە قادا ستران گۆتنێ دە. .
ل سالا(1970)ێ خدر فەقیر ئێكەمین كاسێتا خۆ یا سترانا تۆماركریە و بەردەوام ستران ل كۆچك و دیوانا و داوەتا گۆتینە، و هەروەسا هەموو جۆرێن سترانا ژی گۆتینە سترانێن عەشق و ئەڤینیێ و سوارچاكیێ و مێرخاسیێ، فەرمان و شەرا، سترانێن وەك(دەروێشێ عەڤدی،حمێ و كنعێن،مالا قتۆ و نێسر،تەمەر بەگێ زەری،شڤانێ ئوسۆ،نەواخا براهیم پاشا،عەیشا بالێ،جاسم بەگ،عەدول و گێنج خەلیل)…هتد و خۆشترین ستران لبەر دلێ وی سترانا (عەیشا بالێ) بوو،هەروەسا خدر فەقیر ستران ب چەندین سترانبێژێن چیایێ شنگالێ را گۆتینە وەك(شێخ مووس شێخ سلۆ،دەروێش شێخ میرزا،لەزگین سەیدۆ،كچێ عەمێ،قەپال،پیر مچۆ، خلف الیاس)…هتد .
خدر فەقیر هەردەم هەول ددا كو زارۆكێن خۆ فێری ستران گۆتنێ بكت لەوما نهۆ هەردوو كورێن وی(عەلی و تەحسین) درێژاهیێ ب خەباتا وی ددەن و لسەر رێیا وی د دچن بۆ ستران گۆتنێ، دەنگ و سترانا خدر فەقیر نەبتنێ ل چیایێ شنگالێ دەنگ ڤەدا بەلكو ل هەموو دەڤەرا بەهدینان بەلکو بگرە ل کوردستانێ دەنگ ڤەدایە و بوویە مامۆستایێ سترانا فلكلۆر و چەندین سترانبێژ لسەر دەستێ وی فێری ستران گۆتنێ بووینە ژ وان ژی بلند براهیم و پشكداری د چەندین بەرنامەیێن تلڤزیونی و رادیویان دە كریە و گەنجینەكا مەزن یا سترانگۆتنێ لپێ خۆ هشتیە ژ هەموو ئالیان ڤە.
ل سالا(2005)ێ خێزانا وی (غەزال) دچتە بەر دلۆڤانیا خودێ و ب مرنا وێ گەلەك ئێش و ئازاران دبینت و ژ بەر ئەشقا خدر یا بەردەوام و بێ سنوور بۆ غەزالا خێزانا خۆ سترانەكێ ب ناڤێ (غەزالێ) ل سەر ئۆغەركرنا وێ رە دبێژت وب وێ سترانێ دەرد و ئێشێن ئەشقا خۆ بۆ غەزالێ ددەتە دیاركرن و د نهۆ دە وێ سترانا دناڤ هۆنەرێ دەڤەرا شنگال دە جهەکی تایبەت هەیە و هەروەسان داخواز دكت دەما ئەو ژی دمرت وی برەخ غەزالێ ڤەشێرن، پشتی هنگی ژانێن نەخۆشیا دژوار دكەڤنە دناڤ لاشێ خدر فەقیر دا و رۆژ ب رۆژ بەر ب غەزالا هەڤژینا خۆڤە دچت،ئەو بوو ل رۆژا(29/6/2009)ێ ل باژارێ دهۆكێ چوو بەر دلۆڤانیا خودێ و لبەر مەزارگەهێ شەرفەدین ب رەخ خێزانا وی ڤە هاتە ڤەشارتن.
پشتی وەغه‌ركرنا خدر فەقیر عاشقێن دەنگێ وی رۆژ ب رۆژ بەردەوام زێدە دبن و سترانێن وی دئێنە گۆتن و نوکرن، هەروەسا چەند ڤیستەڤال و كۆنفرانسێن هۆنەری و راپۆرتێن جودا جودا ل سەر ناڤێ وی و بۆ خەباتا وی هاتنە سازكرن و ئەنجام دان.