بنگەھێ لالش پرۆژه‌ك ڕاگه‌هاند
سه‌ما
ب مەرەما ئەنجامدانا ڤەکۆلینان دبوارێن جودا جودا دا ل دۆر ئێزدیان،بنگەھێ لالش یێ ڕەوشەنبیری وکۆمەڵایەتی پرۆژێ خۆ یێ لژێر “ڤەکۆلینێن لالش 2024” ب ھەلکەفتا 31 سالیا دامەزراندنا بنگەھێ لالش ڕادگەھینت، ھەرکەسێ دەستێ نڤیسینێ ھەبیت دکارت بەشداری ڤی بەرنامەی بیت ب ڤەکۆلینەکێ یان پتر لدویڤ ڤان تەوەر و ڕێنمایێن ل خوارێ دیارکرى.
– تەوەرێ دیرۆکی
ئەڤ تەوەرە، دیرۆکا ئێزدیان یا كەڤن وناڤەراست و نوو و ھەڤچەرخ وجوگرافییا دەڤەرێن وان و بوارێن سیاسی و ڕەوشەنبیری ل ھەر دەڤەرەکا ئێزدی لێ ھەبن ل دونیایێ.
– تەوەرێ جڤاکی
ئەڤ تەوەرە، داب و نه‌ريت وپێکھاتا جڤاکی و ھەروسان ڤەکۆلین ل سەر ھندەک دیارده‌يان دناڤ جڤاکێ ئێزدیان چ ل وەلاتی یان ژی ل دەرڤەی وەلاتی.
– تەوەرێ فلکلۆر وئەدەبێ دینی
ئەڤ تەوەرە یێ تایبەتە ب فلکلۆر وتێکستێن دینی بۆ نموونە تێکستێن دینی یێن ئێزدیان و لێبۆرين یان ئێزدی ودینێن دیتر.
تێبینی: ھەر تەوەرەکی (3) ڤەکۆلین ژلایێ لیژنەکا ئەکادیمی یا تایبەت ڤە دێ ئێنە دەستنیشانکرن وخەلاتکرن.
مەرجێن پشکداریێ:
– ڤەکۆلینا دئێتە پێشکێشکرن ل چ جھێن دیتر نەھاتبتە بەلاڤکرن.
– وەک ڤەکۆلینا دەرچوونێ یان ناما ماستەرێ یان تێزا دکتورایێ نەھاتبتە پێشکێشکرن.
– ڤەکۆلین د دەمێ (100) ڕۆژاندا بگەھیت ب شێوێ ئەلکترۆنی بۆ ڤی ئیمێلی بێتە ھنارتن govara.lalish@gmail.com.
– فەرە ڤەکۆلین 8000-9000 پەیڤان نە پتر بیت، ل سەر بەرپەرێن A4 وفۆنتێ Ali_K_Alwand بۆ ناڤەرۆکێ 14 و بۆ پەراوێزان 12 تێنەپەرت.
– فەرە ڤەکۆلین ب شێوەیەکی زانستی وئاماژەکرن ب ژێدەران ل دوماھیکا ڤەکۆلینێ دگەل دیارکرنا لاپەرێ پێزانین ژێ ھاتینە وەرگرتن.
– بۆ ھەر ڤەکۆلینەکێ نڤیسەرەک یان چەند نڤیسەر دکارن بەشداری نڤیسینێ بن.
– ڤەکۆلین ھەکە ھاتبتە وەرگێران ژ زمانەکێ دیتر نائێتە وەرگرتن.
– ھەر (9) ڤەکۆلینێن سەرکەفتی پشتی ھەلسەنگاندنێ دێ نڤیسەرێن وان ب کوژمەکێ دراڤی ئێنە خەلاتکرن ل ئاھه‌نگەکا تایبەت دا.
– ھەر (9) ڤەکۆلین دێ د پەرتوکەکا تایبەت دا ئێنە چاپکرن وڤەکۆلینێن دیتر ئەوێن ل ئاستێ زانستی یێ پێویست دێ دناڤ بەرپەرێن گۆڤارا لالش دا ئێنە بەلاڤکرن.
– ڤەکۆلین دێ ب زمانێن (کوردی- عەرەبی وئينگلیزی) ئێنە وەرگرتن.