ب بريارا سه‌رۆكوه‌زيران قوتابيێن ڕزگاربوويێن ده‌ستێ داعش دێ ڤه‌گه‌رنه خواندنێ
سه‌ما
ب بريارا سه‌رۆكوه‌زيران مه‌سرور بارزانى،وه‌زاره‌تا په‌روه‌رده‌يا هه‌رێما كوردستانێ ژماره‌يه‌كا ئاسانكارييان بۆ ڕزگاربوويێن كوردێن ئێزدى ب مه‌به‌ستا دووباره ڤه‌گه‌راندنا وان بۆ خواندنێ ڕاگه‌هاندن.
ل ڕۆژا پێنج شه‌مبوويێ 18ى تيرمه‌ها 2024ێ،ئالان حه‌مه سه‌عيد،وه‌زيرێ په‌روه‌رده‌يا حكومه‌تا هه‌رێما كوردستانێ دپرێسكۆنفرانسه‌كێ ڕۆژنامه‌ڤانى دا و ب ئاماده‌بوونا سێ ڕزگاربوويێن ژ ده‌ستێ داعشێ، باس ل بريارا مه‌سرور بارزانى سه‌رۆكێ حكومه‌تێ كر كو تايبه‌ته ب ڤه‌گه‌ريانا قوتابيێن ڕزگاربوويێن ئێزدى بۆ سه‌ر پرۆسه‌يا خوادنێ.
وه‌زيرێ په‌روه‌ردێ رۆنكر ژى، ل بن رۆناهييا رێزدار مه‌سرور بارزانى ڕزگاربوويێن ل ژێر ده‌ستێ داعش يێن ناڤێن وان ل ليستا ڕزگاربوويان هاتينه تۆماركرن و ژ خواندنێ هاتبنه ڤه‌قه‌تاندن هه‌موو ئاسانكارى دێ ئێنه كرن دووباره ڤه‌گه‌رنه خواندنێ.
د چارچۆڤێ بڕیارا سەرۆکوەزیران، ئەڤ فەرمانا وەزاری هاته دەرکرن:
1- رێڤه‌به‌ريێن گشتى ل پارێزگه‌هـ و ئيدارێن سه‌ربه‌خۆ ئه‌و ب خۆ دێ سه‌رپه‌رشتييا لژنه‌يه‌كا تايبه‌تمه‌ند د وى بياڤى دا كه‌ن، ب تايبه‌تى ل پارێزگه‌ها دهۆكێ و ئيدارا سه‌ربه‌خۆيا زاخۆ چنكو زۆرينه‌يا رزگاربوويان ل وى سنورى د ئاكنجى نه.
2- ده‌سهه‌لاتا ره‌ها بۆ ده‌رئێخستنا مه‌رجێ ته‌مه‌نى به‌خشينه رێڤه‌به‌ريێن گشتى ل پارێزگه‌هـ و ئيدارێن سه‌ربه‌خۆ ل په‌ى وێ نڤيسارا سه‌رۆكێ حكومه‌تێ ئاماژه پێ دايى.
3- هه‌موو رزگاربوويێن پۆلا 9 بنه‌ره‌تى ته‌مامكرى، و كه‌فتينه د ده‌ستێ داعش ده و ژ خواندنێ ڤه‌قه‌تياين و پشتى ئازادكرنێ ته‌مه‌نێ ياسايى ب سه‌رڤه‌چۆبت، بريار هاتيه دان ئه‌ڤ برگه بێته ڕاگرتن و ڤه‌گه‌رنه به‌ر كه‌رتێ خواندنێ.
4- هه‌موو ڕزگاربوويێن ناڤێن وان د ليستا رزگاربوويان ده و ده‌رچۆيێن نه‌هێ بنه‌ره‌تن، مافێ هه‌ين بێ به‌رامبه‌ر ل په‌يمانگه‌هێن ئه‌هلى بخوونن.
ب گۆڕه‌ى گۆتنا وەزیرێ پەروەردێ ئەم فەرمانە هەر ژ ئیرو 18.7.2024ێ دێ کەفتە د بیاڤێ ب جهئینانێ دە و بۆ سالا خواندنێ 2024_2025 دێ ئێته په‌يره‌وكرن.
وه‌زيرێ په‌روه‌رده‌يا حكومه‌تا هه‌رێما كوردستانێ جه‌خت كر، هەر تشتەک بۆ رزگاربوویێن ئێزدی بێتە کرن کێمە.،هه‌روه‌سا ئەڤ بابەتێ سەرکوەزیران گەلەکێ گرنگە، چنکو گرنگیەکا مەزن ب کەرتێ پەروەردێ ڤە هەیە.