ئه‌نجومه‌نێ ئاساييشا نێڤ ده‌وله‌تى برياره‌ك دبه‌رژه‌وه‌ندا ئێزديان دا دهركر
سه‌ما
ب هه‌لكه‌فتا ده‌هه‌مين بيره‌وه‌رييا جينۆسايدا ئێزديان، ئه‌نجومه‌نێ ئاساييشا نێڤ ده‌وله‌تى برياره‌كا نوو بۆ سزادانا تيرۆرستێن داعشێ دهركر.
ئيرۆ ڕۆژا ئينيێ 9ى تيرمه‌هێ،به‌هزاد فه‌رحان به‌رپرسێ ڕێكخراوا كنيات بۆ ديكيۆمێنتكرنا تاوانێن داعشێ ل دژى ئێزديان بۆ سه‌ما ڕاگه‌هاند؛ل بيره‌وه‌رييا ده‌هێ يا سالڤه‌گه‌ڕا جينۆسايدا ئێزديان ل سه‌ر ده‌ستێ داعشێ ئه‌نجومه‌نێ نێڤ ده‌وله‌تى بريارا 2734 ل ژێر ناڤێ داعش به‌رامبه‌ر دادگه‌هێ دهركر،كو تايبه‌ته ب سزادان و دادگه‌هكرنا تيرۆرستێن داعش و قاعيده ل دژى تاوانێن ده‌رهه‌قى ئێزديان و پێكهاتێن دى و خه‌لكێ بێ گونه‌هـ دا ئه‌نجامداين.
به‌رپرسێ ڕێكخراوا كنيات ئاشكه‌راكر:ئه‌ڤ بريار گرنگيا پابه‌ندبوونا جڤاكێ نێڤ ده‌وله‌تى بۆ دادگه‌هكرنا ئه‌نجامده‌رێن تاوانێن كرێت نيشان دده‌ت.
گۆت ژى:بريارا هاتيه دان قوربانيان ب هيڤى دكه‌ت كو تاوان بێ سزادان ده‌رباز نابن،و رێخۆشكه‌ره بۆ ئاڤاكرنا پێشه‌رۆژه‌كا گه‌ش يا دادپه‌روه‌رانه و ئێمن بۆ هه‌موويان.
جڤاكێ ئێزدى هێشتا ل بن كاريگه‌ريێن جينۆسايدێ دايه،كو ل 3ى ته‌باخا 2014ێ ڕاستى كۆمكوژيێ بوون ل سه‌ر ده‌ستێ داعشێ و تاوانێن كرێت و دژى مرۆڤايه‌تيێ ده‌رهه‌قێ ئێزديان دا هاتنه ئه‌نجامدان.
ژ ئه‌نجامێ هێرشا داعش بۆ سه‌ر شنگالێ ب سه‌دان وه‌لاتيێن ئێزدى هاتنه كوشتن و هه‌زاران هاتنه گرتن و ده‌ربه‌رده‌ر و ئاواره‌بوون و زێده‌ترى 2هه‌زار زارۆيان سێوى مان و چاره‌نڤيسێ ب هه‌زاران گرتيان يێ ديار نينه.