نایف مەحموود
کوردستان ئەو بنگەهــ و خاکا پیرۆزا ڤەحەواندنا چەندین ئول و نەتەوێن جیاواز، ئەو مێرگا پڕی گول و گولزار و چەندین دەنگ و ڕەنگێن جیاواز دناڤ خوەدا هەمبێزکرین، کوردستان لاندکا پێکڤەژیان و ئاشتی و ئارامیێ یە، ئەو جهێ ل هەمو جیهانێ ناڤ و دەنگیا خوە سەلماندی، د وارێ ڕەوشەنبیریا ل هەڤ قەبولکرنێ و ڕێزگرتنا ل بیرو بوچونێن جیاواز. چونکی هەر ئول و نەتەوەکی مافێن خوە یێن پارێزراو هەنە د هەرێما کوردستانێدا بێی جیاوازی، هیچ وەختەکی جوداکاری ژلایێ حکومەتا هەرێمێ و دەستهەلاتا سیاسیا کوردستانێ ڤە نەهاتیە کرن بەرامبەر موسلمان، مەسیحی و برایێن مە یێن ئێزدی و کێم نەتەوێن دی، بەلکی بڤان بیر و بوچون و ئولێن جودا ڤە ڕەسەناتیا کوردستانێ پیرۆز ڕاگرتیە، ئەڤ یەکە بویە هێمایێ جوانی و ناڤ و دەنگیا کوردستانێ. ئەڤ تێکەلیا جوان و ڕەنگا و ڕەنگ بویە هێڤێنێ براتی و یەکسانیێ، بویە گەنجینەیەک بو پێشخستنا هزرو بیرێن ئازاد و پێشخستنا بوارێ زانستی، پەروەردەیی و پەیوەندیێن کومەلایەتی، هەروەسا بویە ئەگەرێ هێز و ئیکگرتنێ، ئەڤ پێکڤەژیانا بویە کولتورەکێ نەگوڕ دناڤ ڕێزێن مەدا، نیشانا مەردینی و سینگفرەهی و دهەڤ گهەشتنا تاکێ کوردە ب هەمی دەنگ و ڕەنگێن جودا ڤە، سەخمەراتی ڤێ یەکێ و ڤێ تێگهەشتنا درست ئەم شیاینە کاروانێ ڤێ کەشتیێ ب خوشی و خەندە و ئارامی بهاژوین و ژیانەکا سەرفەراز پێشکێشی فەرهەنگ و مێژویا گەلێ خوە بکەین. خویایە کو هیچ دەمەکی وەکو جیاوازیا ئولی ل کوردستانێ نەبویە هوکارێ سەرهلدانا شەڕو ئاژاوە و ئالۆزیان یانژی شێواندنا شیرازەیا جڤاکی، بەلکی هەردەم و هەر جارەکا لێکتێنەگهەشتنەک یان بەرەلاییەکا ژنشکەکێڤە سەرهلدابیت، ل وی دەمی هەر زوی نوخبا زانا و ڕەوشەنبیرێن جڤاکی، کەسایەتیێن ئولی ژ هەر ئالیەکی شیاینە جادێ کونترول بکەن و ڕەوشا جادێ و کومەلگەهێ بزڤڕیننە باوەشا خوە یا سروشتی و گیانێ لێبورینێ و لهەڤ و قەبولکرن و پێکڤەژیانێ دوبارو بهێز و جوشتر بەرجەستەکریە، چونکی ژبلی ڤێ ئێکێ چ ڕێگە چارەیێن دی نینن خزمەتا پاراستنا ئاشتی و تەباییا خەلکێ مە بکەت. ژبەرکو ئەڤ ناسناڤێ جوانێ مە هەلگرتی پێدڤیە ڕێز ل پیروزی و ئول و باوەریێن هەڤ بگرین، نەکو بکەڤینە سەنگەرێ هەڤڕکی و شکاندنا بهایێن مروڤایەتی، لێ گەر هات و هەر بێ ڕێزیەکا ببیتە ئەگەرێ شکاندن و بریندارکرنا هەستێن هەر ئولەکی کو ئەڤە وەک ماف و یاسا دڕێ پێدای نین، لەوا هینگێ دڤێت ئەڤ کەسە یان لێبورینەکا گشتی ڕاگەهینیت بو ئاساییکرنا بارودوخی و پەیوەندیان یان ژی بکەڤیتە بەر سزایێن دادگەهێ داکو نەبیتە نەریت و دیاردەکا ئاسایی هەما هەرکەسێ بڤێت د دەرهەقی لایەن و ئولێ بەرامبەردا بێژیت و ئەنجام بدەت، چونکی دێ پشتی هینگێ ئەڤ بەرەلاییە بەرژەنگێن نەرێنی لدویف خوە هێلیت و شیرازەیا جڤاکی دێ تێکچیت، ڤێجا بەروڤاژی دڤێت ئەم کاربکەین بو هندێ دێ چاوا ڤان دەنگ و ڕەنگێن جیاواز کەینە دەستکێن گولا و پێشکێشی کومەلگەهێ خوە کەین، دێ چاوان ڤێ پاپورا ئەم تێدا ب جوانی خەملینین و گەشتا خوە تێدا ب خوەشی و ئارامی و براتی دەرباز کەین.