سه‌ما
پێداچوون و ڕاستڤه‌كرن ل په‌رتۆكا په‌روه‌ردا ئێزدياتيێ ته‌مام بوويه، نۆكه بۆ وه‌زاره‌تا په‌روه‌رده‌يا حكومه‌تا هه‌رێما كوردستانێ هاتيه هنارتن، ب ديزاين و قه‌باره‌يه‌كێ نوو دێ ئێته چاپكرن و به‌رهه‌ڤكرن بۆ سالا نوو يا خواندنێ.
په‌رتۆكا په‌روه‌ردا ئێزدياتيێ قۆناغێن ئێكێ بنه‌ره‌تى تا دوازدێ ئاماده‌يى ب خۆڤه دگرت و چه‌ند بابه‌تێن دى ژى هاتينه زێده‌كرن.
ڕۆژا دووشه‌مبوويێ 19ى ته‌باخا 2024ێ، شه‌مۆ قاسم، ئه‌ندامێ ليژنه‌يا پێداچوونا پرۆگرامێ ئێزدياتى بۆ سه‌ما راگه‌هاند، دوو ليژنه ژلايێ وه‌زاره‌تا په‌روه‌رده‌يا حكومه‌تا هه‌رێما كوردستانێ بۆ پێداچوون و ڕاستڤه‌كرنا بابه‌تێ په‌رتۆكا په‌روه‌ردا ئێزدياتيێ ل قۆناغا بنه‌ره‌تى تا ئاماده‌يى هاتنه پێكئينان، نێزيكى دوو سالانه ل بنگه‌هێ لالش ل دهۆكێ ب سه‌رپه‌رشتيا چه‌ند سه‌رپه‌رشتێن په‌روه‌ردا ئێزدياتيێ كار ل سه‌ر به‌رهه‌ڤكرنا په‌رتۆكێ دئێته كرن.
ئاماژه ب وێ چه‌ندێ دا، ليژنه‌يا پێداچوونێ ب هوورى كار ل سه‌ر په‌رتۆكێ كريه و هه‌موو تێبينى و بۆچۆن ل به‌رچاڤ وه‌رگرتنه و هه‌ر شاشيه‌ك هه‌بت هاتينه ڕاستڤه‌كرن، په‌رتۆك ب ديزاينه‌كا جوان و قه‌باره‌يه‌كێ مه‌زن هاتيه چێكرن و نۆكه ته‌مام بوويه بۆ وه‌زاره‌تێ هاتيه ڤرێكرن.
شه‌مۆ قاسم دبێژت: پشتى په‌رتۆك ژلايێ وه‌زاره‌تا په‌روه‌ردێ ڤه دئێته چاپكرن، بۆ سالا نوو يا خواندنێ(2024/2025)دێ يا به‌رهه‌ڤ بت و دێ ئيسالە ئێته خواندن.
ئه‌ندامێ ليژنه‌يا پێداچوونا پرۆگرامێ ئێزدياتى راگه‌هاند ژى: پشتى جينۆسايدا بسه‌رێ ئێزديان دا هاتى ل شنگالێ ل سه‌ر ده‌ستێ تيرۆرستێن داعشێ، هزر ل زێده‌كرنا بابه‌تێ پێكڤه‌ژيانێ كر و د ناڤا په‌رتۆكێ دا هاتيه زێده‌كرن.