كوردستان 24:
رێڤەبەرێ گشتی یێ دیوانا وەزارەتا ناڤخۆ یا حکومەتا هەرێما کوردستانێ، داخاز ژ کۆمیسیۆنا باڵا یا سەربەخۆ یا هەلبژارتنان دکەت “ژ بۆ سەلامەتیا پرۆسەیا هەلبژارتنان رێکاران توند بکەن.”
هێمن میرانی، بەرێڤەبەرێ گشتی یێ دیوانا وەزارەتا ناڤخۆ د راگەهاندنەکێ دا دیار کر، پشتی جڤینا تیما حکومەتا هەرێما کوردستانێ دگەل کۆمیسیۆنا باڵا یا سەربەخۆ یا هەلبژارتنان، ژ بۆ سەلامەتیا پرۆسەیا هەلبژارتنان، کەرەمکەن کارێ پێدڤی بکەن ژ بۆ جێبەجێکرنا ڤان خالێن ل خوارێ:
ئێک: قەدەغەیە دەنگدەر مۆبایل و کامیرا ببەتە ژۆر، پێدڤیە ل بنگەهێن دەنگدانێ پشکنین بهێتە کرن و رێ ب برنا ژۆر یا مۆبایل و کامیرایێ نەهێتە دان، تەنها رۆژنامەڤان و نوێنەرێن کیانێن سیاسی و چاڤدێرێن ناڤخۆیی و نێڤدەولەتی نەبن، کو ئەوێن باجێ رێپێدانێ ژ لایێ کۆمیسیۆنێ ڤە هەی، رێپێدانە مۆبایل و کامیرا ببەنە ژۆر.
دوو: قەدەغەیە نوێنەرێن کاندیدان هەتا مەودایێ ١٥٠ مەتران ژ بنگەهێن دەنگدانێ نێزیک ببن.
سێ: پێدڤیە هەمی پۆستەرێن کاندیدان و لیستان ل بنگەهێن دەنگدانێ بهێنە راکرن هەتا مەودایێ ١٥٠ مەتران ژ دویراتیا بنگەهێ.
چار: ژبلی وان هێزێن د چارچۆڤێ لیژنا ئەمنی دا هاتینە راسپاردن، چ هێز و کەس نەشێن ب جلکێن لەشکەری ژ بنگەهێن دەنگدانێ نێزیک ببن.
دەمژمێر ٧ـێ ئەڤرۆ ٢٠ـێ ئۆکتۆبەرا ٢٠٢٤، پرۆسەیا دەنگدانا گشتی ژ بۆ هەلبژارتنا خولا شەشێ یا پەرلەمانێ کوردستانێ دەست پێ کر. هەروەسا د دەنگدانا گشتی دا دوو ملیۆن و ٦٨٦ هزار و ٥٧٨ دەنگدەر مافێ دەنگدانێ هەیە، کو ل سەر هەر چار بازنەیێن هەولێر، دهۆک، سلێمانی و هەڵەبجە دهێنە دابەشکرن.