بەری نەهـ سالان ئانکو ل 13ی تشرينا دووێ ل سالا 2015 ب سەرپەرشتیا راستەخۆیا سەرۆک بارزانی سەنته‌رێ باژێرێ شنگال و گوندێن دەوروبەر ژلایێ هێزێن پێشمەرگێن قارەمان ڤە هاتە رزگارکرن و بوو داستانەکا دیرۆکی هەموو کوردەکی شەرەفمەند شانازیێ پێ دکەت.
ئۆپەراسیۆنا رزگارکرنا شنگالێ ب سەرپه‌رشتيا راستەوخۆیا سەرۆک بارزانی و پشکداریا هژمارەکا مەزن یا پێشمەرگێن کوردستانێ و هێزێن ئاسمانی یێن هەڤپەیمانيا نێڤدەولەتی هاتە ئەنجامدان و شنگال ژ دەستێن تيرۆرستێن داعش هاتە رزگار کرن و دپەیامەکێ دا بۆ دەزگەهێن راگەهاندنێ ل سەرێ چیایێ شنگالێ سەرۆک بارزانی مزگینیا رزگارکرنا شنگالێ راگەهاند بۆ گەلێ کوردستانێ و هەموو جیهانێ.
رزگاركرنا باژێرێ شنگالێ دڤیا ببته گاڤا ئێكێ بۆ ڤه‌هێلانا ئێشێ و راستڤه‌كرنا ره‌وشێ ل ڤى باژێرێ قوربانیده‌ر، لێ مخابن تشته‌ك نه‌هاتیه گوهۆرین، و ئازار هێشتا د دل و له‌شێ ئێزدیان دا دمینیت، ژبه‌ر سیاسه‌تێن شاش، و ده‌ستێوه‌ردانێن ده‌ره‌كى، و نه‌جێبه‌جێكرنا رێككه‌فتنان وه‌ك رێككه‌فتنا شنگالێ، يا كو دشیا ئازارێن وان ب داوى بينت.
د ڤێ بیره‌وه‌ریا دیرۆكى دا كو تێدا شنگال ژ ده‌ستێن داعش هاته رزگاركرن، ئه‌م داخوازێ ژ جڤاكا نێڤده‌وله‌تى دكه‌ین كو پشته‌ڤانیا ئاسایىكرنا ره‌وشا شنگالێ بكه‌ت ب مادى و مه‌عنه‌وى و به‌شداریێ د ئاڤاكرنا وێ دا بكه‌ت، و داوى ب چاندا پشتگۆخستنا مافێن خه‌لكێ وێ بینت.
ده‌سته‌يا بلندا بنگه‌هێ لالش يێ ره‌وشه‌نبيرى و كۆمه‌ڵايه‌تى/دهۆك
13ى تشرينا دووێ 2024