ناڤه‌ندا نووچه‌یان – سه‌ما
ئيرۆ ئێك شه‌مبوويێ 9ى شوباتا 2025ێ، ل كۆچكا ئيمارەتێ ل شێخان، مير حازم تەحسين سەعيد به‌گ، ميرێ ئێزديان پێشوازى ل شێخ مورشيد خه‌زنه‌وى، زانایێ ئۆلی یێ ڕۆژئاڤایێ كوردستانێ كر و هه‌ردو ئاليان دانوستاندن ل سەر پێكڤەژيانا ئاشتيانە دناڤبەرا ئايينان دا و گرنگيا چه‌سپاندنا ئايينێ ئێزدى د دەستوورێ سووريێ يێ نوو دا و پاراستنا مافێن وان يێن تەمام كرن.
د هه‌ڤديتنێ دا، شێخ خەزنەوى ته‌كه‌زى ل گرنگيا پێكڤەژيانا ئاشتيانە دناڤبەرا هەموو پێكهاتێن ئايينى و نەتەوەيى ل سووريێ كر و ئاماژە دا كو جوداهيێن ئايينى و چاندى دڤێت ببنە ژێده‌رێ هێز و ئێكگرتنێ، نە كو ببنە ئەگەرێ ژێكجودابوونێ، هەروەسا داخواز كر كو گۆتارێن تايفى يێن كو ئارمانجا وان پەيداكرنا به‌لبه‌لێ نه دناڤبەرا گەلان دا، بێنە رەتكرن و دوپاتكر كو ئێكگرتنا پێكهاتان تنێ گەرەنتيا پاشەرۆژەكا ئارام و سەقامگيرە.
شێخ خەزنەوى ئاماژە دا گرنگيا رۆلێ ئايينى د بهێزكرنا ئێكگرتنا نشتيمانى دا و دوپاتكر، ئايين دڤێت ببتە فاكتەرەكێ نێزيكبوونێ نە كو دوروكەفتنێ، وى هەروەسا جه‌خت ل سەر پێدڤيا هەڤكاريێ دناڤبەرا هەموو پێكهاتان دا كر بۆ روبروبوونا ئاستەنگێن دەرەكى يێن كو گه‌فێ ل سەقامگيريا دەڤەرێ دكەن، ب تايبەت دەستێوەردانێن كو ئارمانجا وان تێكدانا ئێمناهيا جڤاكييە.
ژ ئاليێ خۆڤە، ميرێ ئێزديان پشتەڤانيا خۆ يا تەمام بۆ مافێن كێمينەيێن ئايينى، ژ وان ئێزدى دوپاتكر و ئاماژە دا گرنگيا چه‌سپاندنا مافێن وان د دەستوورێ سووريێ يێ نوو دا بۆ گەرەنتيكرنا وەكهەڤى و دادپەروەريا جڤاكى.