پشتی پێلەکا باران بارینێن زۆر یێن ئەڤ سالە، کەیفخۆشیەکا مەزن کەفتیە د دلێ جۆتیارێن دەڤەرێ دا، ب تایبەت پشتی دەربازبوونا سالێن هشکەسالیێ و ئەو زیانێن مەزن یێن گەهشتینە کەرتی چاندنێ، لێ دگەل گەشبینیا ب دەخل و دانێ ئەڤ سالە، ترسەکا دی ل دەف جۆتیاران پەیدا بوویە.
جۆتیار د ئەڤ سالە دا د ناڤبەرا دوو مەترسیان دانە ئهوژی زێدەبوونا رێژا باران بارینێ کو رەنگە ببتە ئەگەرێ زیان گەهاندنێ ب جۆتیاران د دەمێ چنینێ دا و یا دن ترس ژ نەمانا بەهایێ گەنمی و وەرنەگرتنا تەمامیا بەرهەمێ وان ژ لایێ حکومەتێ ڤە ب بههایەکێ گونجای کو ل ئاستێ وێ زەحمەت و مەزاختیێن وان بت.
خالد بیبۆ، رێڤەبەرێ سایلۆیا شێخان، د داخۆیانیەکێ دا بۆ “سەما” دیار کر کو سالا بۆری نێزیکی 19 هزار و 500 تەنێن گەنمی ژ جۆتیارێن قەزا شێخان و دەوروبەر هاتبوونە وەرگرتن، لێ بۆ ئەڤ سالە، هێشتا پلانا وەرگرتنێ ب تەمامی نەدیارە.
ناڤهاتی ئاماژە ب وێ چەندێ ژی کر کو نێزیکی سێ سالانە “غەدر” ل جۆتیارێن هەرێما کوردستانێ دهێتە کرن، چونکی پشکا وان یا گەنمی دهێتە دەستنیشانکرن و تەمامیا بەرهەمێ وان ناهێتە وەرگرتن، و ل پارێزگەهێن دی یێن عیراقێ کو تەمامیا گەنمی لێ دهێتە وەرگرتن، ئەڤ چەندە دبتە ئەگەر کو بەشەکێ زۆر یێ گەنمی د دەستێ جۆتیارێن هەرێمێ دا بمینت و زیانێ بکەن.
رێڤەبەرێ سایلۆیا شێخان داخواز کر کو چارەسەریەکا بنەڕەتی بۆ ڤێ کێشێ بهێتە دیتن و تەمامیا گەنمێ جۆتیاران بهێتە وەرگرتن دا کو ماندووبوونا وان ب هەدەر نەچت.
هەروەسا دهێتە پێشبینیکردن کو ئەڤ سالە پرۆسەیا ناڤـ نڤیسینێ ب شێوازەکێ ئەلکترۆنی بت و کارتێن ئەلکترۆنی بۆ وەرگرتنا پارەیێ جۆتیاران بهێنە چێکرن، ب مەرەما ب رێکوپێکرنا پرۆسەیا دارایی و وەرگرتنا شایستەیێن وان.
