ناڤەندا نووچەیان – سەما
ئيرۆ دووشەمبوويێ، 30ـی ئادارا 2026، وەزارەتا خواندنا بلند و ڤهكۆلينێن زانستی، بڕیار دا پرۆسەیا خواندنا ساالا 2025 – 2026 ب شێوازێ ئۆنلاین و دیجیتالی بێته تهمام كرن.
بۆ ڤێ مهرهمێ وەزارەتێ چەند ڕێکار و ڕێنمایێن نوو بۆ زانکۆ و پەیمانگەهان بهلاڤ كرن، کو ل 30/3/2026 خواندن ب شێوێ ئۆنلاین ل ههموو زانکۆ و پەیمانگەهێن حکومی و تایبەت يێن هەرێما کوردستانێ دێ دەست پێ كهت.
رێنمایێن خواندنا بلند بۆ دەواما زانکۆ و پەیمانگەهان:
–دەستهەلات دئێتە دان ب زانکۆ و پەیمانگەهان ل دووڤ جهێ جوگرافی و تایبەتمەندیا بەشێن زانستی بۆ گرتنەبەرا هەر شێوازەکێ خواندنا ئۆنلاین و دیجیتالی و بکارئێنانا ئێک ژ پلاتفۆرمێن ستانداردێن جیهانی.
-سەرەڕای خواندنا ئۆنلاین یا ڕاستەوخۆ، پێدڤییە زانکۆ و پەیمانگەهـ تەمامیا وانەیان ب شێوێ ئەلکترۆنی ل سەر وێ پلاتفۆرمێ بەرهەڤ بکەن ئەوا بۆ وانەگۆتنێ بکار دئینن.
-کۆلیژێن پزیشکی، زێدەباری وان بابەتێن ب ئۆنلاین وەردگرن، بۆ وانەیێن پراکتیکی و تیۆریێن دی دشێن بچنە د ناڤ نەخۆشخانەیان دا و بەردەوامیێ ب خواندنا خۆ بدەن.
-ئەو وانەیێن ب شێوێ ئۆنلاین و ڕاستەوخۆ دهێنە گۆتن، پێدڤییە د دەمێ دەواما فەرمی و خشتێ وانەیێن ڕۆژانە دابن،نابیت بکەڤنە پشتی دەواما فەرمی و شەڤان.
-سەبارەت ب وانەیێن پراکتیکی، ئەو وانەیێن دشێن ب ڕێکا ئۆنلاین بهێنە گۆتن ل دویڤ پسپۆڕیێن جودا، دێ ب شێوێ ئۆنلاین هێنە گۆتن. ئەو وانەیێن پراکتیکی یێن پێدڤی ب ناڤ کەمپەسێ هەین، زانکۆ دێ چاڤەڕێی هەلسەنگاندنا ڕەوشا حەفتیێن بهێت کەن دا کو د دەمێ ئاسایی بوونا ڕەوشێ دا ل ناڤ کەمپەسێ بهێنە گۆتن.
-سەبارەت ب ئەزموونان (ئیمتیحانان)، پێدڤییە ل سەر زانکۆ و پەیمانگەهان ب ڕەچاڤکرنا ڕەوشێ و ل دویڤ خشتەکێ گونجای بۆ هەر کۆلیژ و بەشەکێ زانستی ئەزموونان ڕێکبێخن، ب مەرجەکێ کو هاتنوچوونا قوتابیێن دەرڤەی باژێڕی بهێتەبەرچاڤوەرگرتن و ل هەمان دەم دا خشتێ کۆلیژان د ئێک دەم دا نەبن دا کو قەرهبالغی ل ناڤ زانکۆ و بەشێن ناڤخۆیی دروست نەبت.
-کۆرسێن خولێن پێداگۆجی و سەنتەرێن زمانان ب شێوێ ئۆنلاین دێ بەردەوام بن.
-گەنگەشا نامەیێن (ماستەر و دکتۆرا) هەر وەک پێشتر وەزارەتێ بڕیار ل سەر دای، بتنێ سەرۆک و ئەندامێن لژنەیێ و سەرپەرشتیار و توێژەر دێ ئامادەبن.
-ڕێڤەبەریا ئایتی (IT) ل سەرۆکاتیا هەمی زانکۆ و پەیمانگەهان د ڤی دەمی دا دێ بەردەوام بن ل سەر کارێن خۆ بۆ چارەسەرکرنا هەر گرفتەکا تەکنیکی بۆ کۆلیژ و بەشان و هاریکاریکردنا قوتابیان.
-بۆ هەر پرسەکا نوی یا دهێتە پێش و د ڤێ گشتاندنێ دا ئاماژە پێ نەهاتبیتە کرن، زانکۆ و پەیمانگەهـ دێ پەیوەندیێ ب فەرمانگەهێن پەیوەندیدارێن ناڤ دیوانا وەزارەتێ کەن ب مەبەستا وەرگرتنا ڕێکاران.