ناڤەندا نووچەیان – سەما
ئیرۆ سێ شەمبوویێ، 14ی نیسانا 2026، مەسرور بارزانی، سەرۆکێ حکومەتا هەرێما کوردستانێ پەیامەک بەلاڤکر و ڕاگەهاند؛ د سالیادا ئێرشێن بەدناڤێن ئەنفالێ و جینۆسایدا گەلێ کوردستانێ دا، داخوازێ ژ حکومەتا عێراقێ دکەین بەرپرسیارەتییێن خۆ یێن دەستووری و ئەخلاقی بۆ قەرەبووکرنا شایستە یا مالباتێن قوربانییان بجهـ بینت.
دەقێ پەیاما سەرۆکێ حکومەتا هەرێما کوردستانێ؛
هێرشێن بەدناڤێن ئەنفالێ، ئێک ژ دڕندانەترین هێرشێن پاقژکرنا ڕەگەزی و جینۆسایدێ بوون کو ژ لایێ رژێما پێشوو یا عێراقێ دژی گەلێ کوردستانێ هاتنە ئەنجامدان و بوونە ئەگەرێ بێسەروشوونبوون و شەهیدکرنا هزاران کەسێن بێ گونهە یێن کوردستانێ و وێرانکرنا هزاران گوند و دێهاتێن کوردستانێ.
ئەڤ جینۆساید و کۆمەلکوژییێن بەرانبەر خەلکێ کوردستانێ هاتینە کرن، دڤێت هەمیشە د بیرا مە دا بمینن و نەوەیێن مە بزانن کو دەستکەفتێن مە یێن نوکە ب بێ زەحمەت بدەست نەهاتینە و کەسێ ژی خێر پێ مە نەکریە، بەلکو بەرهەمێ خەبات و خوینا هزاران شەهیدێن سەربلندێن کوردستانێ یە.
د ڤێ یادێ دا، تەکەزێ ل سەر وێ چەندێ دکەینەڤە کو دڤێت حکوومەتا عێراقێ بەرپرسیارەتیا خۆ یا ئەخلاقی و دەستووری بجهـ بینیت و ب شێوەیەکێ شایستە، قەرەبوویا مالبات و کەسوکارێن وان شەهید و ئەنفالکریێن کوردستانێ بکەتەڤە.
د سیهـ و هەشتەمین سالیادا ئەنفالێ دا، سلاڤ ل گیانێ پاکێ ئەنفالکرییان و سەرجەم شەهیدێن کوردستانێ بن.