ناڤەندا نووچەیان – سەما
دوهى ڕۆژا ئينيێ 3ـى تهمموزا 2026، ب پشتهڤانييا خێرخوازان و پشتی چەندین هەیڤان ژ کار و خەباتا مەزن و بەردەوام، مەزارگههێ شێخی زەری ل گوندێ سرێچكا سهر ب ناحيهيا ئهلقوش ڤه هاته نووژهن كرن و هۆلهكا تازیيان یا تایبەت بۆ ژنان ژى هاتە ڤهكرن.
جڤاتا جڤاكى يا گوندێ سرێچكا دياركر، ل دەستپێکێ، هلێلا مەزارگههێ شێخی زەری ب ڕێوڕەسم و داب و نهريتێن ئۆلی هاتە سواركرن، ب ئامادەبوونا جەهوەر عەلی بەگ، وهكيلێ ميرێ ئێزدييان و نوونەرێ بابێ شێخ و چەندین ئەندامێن جڤاتا ڕۆحانی و موختار و مجێوران و کەساتیيێن حزبی، جڤاکی، ئۆلی و ڕەوشەنبیری یێن گوندێن دەوروبەر.
ئاماژه ب وێ چهندێ دا، پشتی ب داوى هاتنا ڤەکرنا مەزارگههێ شێخی زەری و سواركرنا هلێلێ، ئامادهبوويى بەرەف هۆلا تازیيان یا تایبەت ب ژنان ڤە چۆن بۆ ڤەکرنا هۆلێ.
پاشان مجێورێ گوندێ سریچکا شێخ مشوەر بەدەل پەیڤەکا کورت دەربارهى قۆناغێن ئاڤاکرنا مەزار و هۆلێ و تێچۆيا وان پێشکێش کر، کو نێزیکی 140 ملیۆن دینارێن عێراقی بوون.
ل دووڤدا کۆمەکا خلمەتکاران یێن کو زەحمەتەکا مەزن د خزمەتا ئاڤاکرنا مەزارێ دا کێشایى، ب دیاریيێن ڕێزلێنانێ ژ هاتنە خەلات کرن. پاشان خلمهتكار شەرو ئیبراهیم کوشتو هندەک سەبەقێن ئۆلی یێن گرێدایی ب هەڤکاری و تەباییێ د خزمەتا ئێزدیياتیيێ و خەلک و جڤاکێ وان دا پێشکێش کرن.