ناڤەندا نووچەیان – سەما
ئيرۆ چارشەمبێ، 15ی تەممووزا 2026، وەزارەتا کارەبێ یا حکومەتا هەرێما کوردستانێ د ڕاگەهاندنەکێ دا هوورکاریێن گرێدایی دانا دراڤى و بڕینا کارەبێ د چارچۆڤەیێ پڕۆژەیێ “ڕۆناکی” دا بەلاڤ کرن.
ل دوو ڕاگەهاندنێ، هەڤپشکێن کارەبێ بتنێ 50 رۆژ ل بەردەستن بۆ دانا دراڤێ پسوولێن خۆ، بەرووڤاژی ب شێوەیەکێ ئۆتۆماتیکی کارەبا وان دێ ئێتە بڕین.
وەزارەتا کارەبێ ئاماژە ب وێ چەندێ کریە کو ماوەیێ 50 رۆژان وەک دەمەکێ ستاندارد هاتیيە دەستنیشانکرن داکو هەڤپشک دراڤێ پسوولێن خۆ بدەن. ئەڤ ماوەیە ئێکسەر پشتی بەردەستبوونا پسوولا کارەبێ ل سەر سەکۆیا دیجیتاڵی یا (ئی-پسوولە) دەست پێ دکەت.
هەڤدەم وەزارەت داخواز دکەت کو هەڤپشک قەرێن خۆ یێن کهڤن یێن بەریيا پڕۆژەیێ رۆناکی بدەن، چنکو د دەمەکێ نێزیک دا نەدانا قەرێن کهڤ ژی دێ بتە ئەگەرێ بڕینا ئۆتۆماتیکی یا کارەبێ.
دهربارهى ئەگەرێ جێبەجێکرنا ئەڤی سیستەمی، وەزارەتا کارەبێ ڕۆن کریيە کو مەبەست ژێ دادپەروەری و پشتڕاستبوونا بەردەوامیيا دانا کارەبا 24 دەمژمێری یە. بهحس ل وێ چەندێ ژی کر کو نەدانا دراڤێ کارەبێ ژلایێ پشکەکا هەڤپشکان ڤە، بارگرانیيێ دکەتە سەر ملێن وەزارەتێ و شیانێن دابینکرنا کارەبا بەردەوام کێم دکەت.
وەزارەتا کارەبێ داخوازێ ژ هەڤپشکان دکەت کو ب زووترین دەم خۆ د پڕۆژەیێ ڕۆناکی دا تۆمار بکەن، داکو ئێکسەر ب ڕێیا کورتەنامەیێن مۆبایلێ (SMS) ژ دەرکەفتنا پسوولا نوو و دەمێ دانا دراڤى ئاگەهدار بن. پرۆسەیا خۆتۆمارکرنێ ژی ب ساناهی یە و دكارت ب ڕێیا پەیوەندیکرنێ ب هژمارا (1992)، یان سەرەدانا مالپەرێ (runaki.gov.krd)، یان ژی سکانکرنا کیو ئاڕ کۆدی (QR Code) یێ سەر پسوولێ، یان ژی سەرەدانا نێزیکترین بنگەهێ فرۆشتنا وزەی بێتە کرن.
د پشکەکا دی یا ڕاگەهاندنێ دا هاتیيە، پێتڤیە پارەدان ب ڕێیا (ئی-پسوولە) ڤە بت، چنکو بلەزترین ڕێیەکە بۆ دوورکەڤتنێ ژ بڕینا کارەبێ. ئەگەر کارەبا هەڤپشکەکێ ژی بێتە بڕین، پشتی دانا تمامیيا دراڤى، د ماوەیێ 24 دەمژمێران دا کارەبا وی دێ بۆ ئێتە ڤەگەڕاندن. وەزارەت تهكهزێ ل سەر هندێ دکەت کو پێدڤیيە تمامیيا دراڤێ پسوولێ بێتە دان و دانا نیوەچل یان پشکەک ژ دراڤى نائێتە قەبوولکرن.
سەبارەت تێگەهشتنێن شاش یێن گرێدایی بارودۆخێ ئابووری و مووچەیى، وەزارەتا کارەبێ دیار کریيە کو بترييا هەڤپشکان د دەمێ خۆ دا دراڤى ددەن. دانانا ماوەیێ 50 ڕۆژان وەک مۆڵەتەکە بۆ هەڤپشکان داکو بكارن دراڤى ئامادە بکەن و دادپەروەریيێ بۆ هەموویان دابین بکەت. هەروەسا سەبارەت وان کەسێن دراڤێ وان یێ ساخلەمیيێ جێگیر نینە و ئامیرێن پزیشکی بکار دئینن، وەزارەتێ ڕاگەهاند کو دێ ڕەوشا وان کەسان ل بەر چاڤ ئێتە گرتن و ب شێوەیەکى تایبەت سەرەدەری دگەل ئێتە کرن.
وەزارەتا کارەبێ داخوازێ دکەت، هەڤپشک کۆنترۆلا بكارئينانا کارەبا خۆ بکەن، چنکو سیستەم ب ڤی شێوەی یە کو هەرچەندە کارەبا کێمتر بێتە بکارئينان، كوژمێ دراڤێ سەر پسوولێ ژی دێ هندە کێمتر لێ ئێت.
د ڕاگەهاندنێ دا هاتیيە: “نێزیکی 80% ژ هەڤپشکێن مالان د پڕۆژەیێ ڕۆناکی دا دراڤى کێمتر ددەن بەراورد دگەل وی دەمێ دراڤ ددا موهلیدەیێن ئەهلی، د هەمان دەم دا مفاى ژ کارەبەکا 24 دەمژمێری یا پاقژ سەلامەتتر دبینن.”