ناڤەندا نووچەیان – سەما
پشتی گرتەیەکا ڤیدیۆیی بەلاڤ بووی و تێدا پەیامەکا دژوار و پر ژ سفکاتی و گەف ئاراستەی کوردێن ئێزدی دکەت، ئێکەتییا زانایێن ئایینێ ئیسلامێ ل کوردستانێ ڕادگەهینت: ئەو جۆرە ئاخفتن و پەیامێن دژوار پەیوەندی ب هەرێمێ ڤە نینە و زانایێن ئایینی ل کوردستانێ هشیارن و ژ پێکڤەژیانا ئاشتییانە تێدگەهن.
ل سەر ڤێ یەکێ، د. عەبدوللا شێرکاوەیی، پەیڤدارێ ئێکەتییا زانایان ڕاگەهاند: ئەو جۆرە دەنگێن توندڕەو و نەشاز پەیوەندی ب هەرێما کوردستانێ ڤە نینە، ل هەر دەرەکێ بت ئەم وان جۆرە گۆتاران ڕەت دکەین و ئیدانە دکەین، کو ب چو لۆژیکەکێ پەیامێن وەسا دەربڕینێ ژ ئاین و ئاینداریێ ناکەن و دژبەری ڕوحا ئایینی نە.
گۆتژی: د دیتنا زانایێن ئاینیدا، وەلاتییێن کوردستانێ ب هەموو جیاوازییان ڤە ل کوردستانێ ئێک جەستەن، ل هەر دەرەکێ وەلاتیەک تووشی ئازارەکێ بت یان ژی رووبەروویی توندڕەوییەکێ ببت، ئازار دگەهتە هەموویان.
پەیڤدارێ ئێکەتییا زانایان ئاماژە ب هندێ ژی کر، خۆشبەختانە زانایێن ئایینی هشیارن و ل کوردستانێ تێگەهشتنا دروست بۆ ئایین و پەیاما میانڕەوی و پێکڤەژیانا ئاشتییانە هەیە، چو جاران ڕێ ب وان جۆرە کەس و ئاخفتنێن وەسا نادەن، کو دڤێن ب بێ بەرپرسیارانە د ناڤ کۆمەلگەهێدا تشتێن وەسا بەلاڤ بکەن، ب وی زمانێ خۆ و ناڤودەنگییا ئیسلامێ لکەدار دکەن.