مووچەیێ هەیڤا هەفت گەهشت و دێ ئێتە دابه‌ش كرن

ناڤەندا نووچەیان – سەما

تەمویلکرنا مووچەیێ مەها تەمموزێ کەڤتە سەر هەژمارا بانکیا وەزارەتا دارایی و ئابۆری.

وەزارەتا دارایی و ئابۆری یا حکومەتا هەرێما کوردستانێ ڕادگەهینت: كوژمێ (830,782,000,000) هەشت سەد و سیهـ ملیار و هەوت سەد و هەشتى و دو ملیۆن دینار، وەک تەمویلکرنا مووچەیێ مەها تەمموزێ یا فەرمانبەر و مووچەخۆرێن هەرێما کوردستانێ، ب فەرمی کەڤتە سەر هەژمارا بانکیا وەزارەتا دارایی و ئابۆری یا حکومەتا هەرێما کوردستانێ ل لقا هەولێرێ یا بانکا ناڤەندییا عێراقێ.

وەکی مەهێن بۆری، وەزارەتا دارایا فیدڕال كوژمێ (120,000,000,000) سەد و بیست ملیار دیناران وەک پشکا گەنجینەیا فیدڕالی ژ داهاتێن نانەوتیێن هەرێما کوردستانێ بۆ مەها تەمموزێ، ژ سه‌رجه‌مێ گشتى يێ تەمویلکرنا مووچەی بڕییە (کێمکرییە).

هه‌ڤده‌م، هەر د چارچۆڤەیێ تەمویلکرنا مووچەیێ مەها تەمموزێ دا، كوژمێ (3,326,931,000) سێ ملیار و سێ سەد و بیست و شەش ملیۆن و نه‌هـ سەد و سیهـ و ئێك هەزار دینار نەهاتییە هنارتن، کو تایبەتە ب پڕکرنا شایستەیێن مووچەیێ مەهێن بۆری یێن خانەنشینێن شارستانی و سەربازی ل هەرێما کوردستانێ.

تێبینی؛ پشتی تەمامکرنا ڕێکاران و وەرگرتنا دراڤى ب شێوێ کاش ژ لقا هەولێرێ یا بانکا ناڤەندییا عێراقێ، ڕاستەوخۆ لیستا مووچەیى دێ ئێتە دابه‌شکرن و ل نێزیکترین دەم دێ دەست ب دابەشکرنا مووچەیێ مەها تەمموزێ ئێتە کرن.

ڕاگەهاندنا وەزارەتا دارایی و ئابووری