ناڤەندا نووچەیان – سەما
میر حازم تەحسین بەگ، میرێ ئێزدییان ل کوردستان، عێراقێ و جیهانێ و سەرۆکێ جڤاتا ڕۆحانی یا بلند یا ئێزدییان، سەرکەڤتنا بەربژارێن ئێزدی د ئەندامەتییا پەرلەمانێ باژێرێ ئۆلدنبورگ دا ل ئەلمانیا پیرۆز کر.
ئیرۆ دوشەمبێ، 14ی ئەیلوولا 2026، میرێ ئێزدییان میر حازم تەحسین بەگ، میرێ ئێزدییان ل کوردستان، عێراقێ و جیهانێ و سەرۆکێ جڤاتا ڕۆحانی یا بلند یا ئێزدییان، پەیامەکا پیرۆزباهییێ بەلاڤ کر، ب هەلکەڤتا سەرکەڤتنا چار بەربژارێن ئێزدی د هەلبژارتنێن جڤاتا باژێرڤانییان ل باژێرێ ئۆلدنبۆرگ دا ل ئەلمانیا.
میرێ ئێزدییان د پەیاما خۆ دا نڤیسایە: گەرمترین پیرۆزباهییان ڕابەری سەرکەڤتییێن ئێزدی دکەم ب هەلکەفتا بدەستڤەئینانا کورسییان د پەرلەمانێ باژێرێ ئۆلدنبۆرگ یێ ئەلمانی دا.
دیار ژی کر، ئەڤ سەرکەڤتنە دیار دکەت کو جڤاکێ ئێزدی خودان شیانێن وەسانە بۆ بدەستڤەئینانا بلندترین پۆستان ئەگەر دەرفەتێن گونجای بۆ بێنە ڕەخساندن و خزمەتا وان وەلاتان بکن ئەوێن کەشوهەوایەکێ ئازادی و دیموکراسییێ بۆ وان دابین کری.
هەروەسا نڤیسایە: ئەڤ دەستکەڤتە دیار دکەت کو جڤاکێ ئێزدی جڤاکەکێ چالاکە و کاریە خۆ ل گەل جڤاکێن پێشکەفتی دا بگونجینت، و ئەڤە ب خۆ ژی دەستکەڤتەکە زێدەباری دەستکەڤتێن جڤاکێ ئێزدی دبت.
د پشکەکا دی یا پەیاما خۆ دا دبێژت: هیڤیخوازم ئەڤ سەرکەڤتنە ببتە دەستپێکا خێرێ بۆ بدەستڤەئینانا مافێن سیاسی، مەدەنی و یاسایی یێن ئێزدییان و ببیتە جهێ باوەرییێ بۆ بەخشینا مافێ پەنابەرییا مرۆڤاتی بۆ ئێزدییان و بڕیارێن دەرێخستنێ ژ وان نەگرن، دا کـو مفا ژ شارەزایی و شیانێن جڤاکێ ئێزدی بێتە وەرگرتن ل ئەورۆپا و تەڤایا وان وەلاتێن کـو کۆچ بۆ کری.
دوهی ئێکشەمبێ 13/9/2026، هەر چار بەربژارێن ئێزدی د هەلبژارتنێن خوەجهی یێن جڤاتا باژێرڤانییێ ل باژێرێ ئۆلدنبۆرگ ل وەلاتێ ئەلمانیا سەرکەڤتن، ئەو ژی ئەڤەنە:
گوزەل تۆلان – پارتا سۆسیال دیموکرات
نۆژدار سەعید – پارتا کەسک
دارا حاول بکۆ – پارتا کەسک
لەیلان دومان – پارتا چەپ