ناڤه‌ندا نووچه‌يان – سه‌ما
ڤيستيڤالا ترى و هنگڤينى ل باژێرێ دهۆکێ ب بەشدارییا 80 جۆتیاران دەست پێ کر و بڕیارە بۆ ده‌مێ سێ رۆژان بەردەوام بت.
ئيرۆ شه‌مبی، 3ـى ئوكتۆبه‌را 2026، ب چاڤدێری و ئاماده‌بوونا “د.عه‌لی ته‌ته‌ر”پارێزگارێ دهۆكێ و بریندار حه‌یده‌ر، ده‌ڤه‌ردارێ دهۆكێ و دژوار شه‌كه‌ت، ده‌ڤه‌ردارێ سێمێلێ و ئه‌حمه‌د جه‌میل، ڕێڤه‌به‌رێ گشتی یێ چاندنێ و زكری به‌شیر، ڕێڤه‌به‌رێ كۆمپانییا كاڤین گروپ و هژماره‌كا به‌رسێن داموده‌زگایێن جودا، ڤیسته‌ڤالا 19 یا تری و هنگڤینی ل فاملی مۆل هاته ڤه‌كرن.
پارێزگارێ دهوكێ د كۆنگره‌كێ ڕۆژنامه‌ڤانی دا پشته‌ڤانییا حكومه‌تا هه‌رێما كوردستانێ بۆ پێشئێخستنا كه‌رتێ چاندنێ و به‌رچاڤكرنا به‌رهه‌مێن ناڤخویی دوپات كر، هه‌روه‌سا ده‌ستخۆشی ل ڕێكخه‌رێن ڤیستيڤالا ڕێڤه‌به‌رییا گشتی یا چاندنێ و كوردستان فاونده‌یشن و كاڤین گروب كر كو سالانه ئه‌ڤێ ڤیستيڤالێ رێك دئێخن و دبیه ده‌لیڤه‌یه‌ك بۆ به‌رچاڤكرنا به‌رهه‌مێن هژماره‌كا زۆرا جۆتیارێن ده‌ڤه‌رێ.