ناسنامە ب هەلويستێن سیاسی یێن کەسان ڤە نائێتە دیارکرن، و نە ژی دیارییەکە ئالییەک بدەتە یێ دی، یان بڕیارەکە دەزگەهەک دەرێخت.
هەروەسا، ناسنامە نە بەلگەنامەیەکە کو ل دووڤ حەز و بەرژەوەندییان بێتە گوهۆڕین، به‌لکو د هشیاریيا مرۆڤی دا د ریشەدارە، ژ بەر کو وی ب دیرۆک، ئەرد، کەلەپوور، زمان و بیرەوەرییا وی یا کو بۆ سەردەمێن ژيياتييا وی یا ئێکانە درێژ دبت، گرێدده‌ت.
و ئەگەر ژ مافێ مرۆڤی بت کو خۆ ناس بکەت و بۆچوونا خۆ ل سەر ژيياتييا خۆ بێژت، لێ ئەڤ مافێ تاکەکەسی دەستهەلاتێ نادەتێ کو ناسناما پێکهاتەکى ب تەڤاهی دارێژت، یان بیرەوەری و دیرۆکا پێکهاتەیی ب بڕیارەکا تاکەکەسی کێم بکەت کو هشیاریيا پێدڤی ب کوورى و درێژبوونا وێ دیرۆکێ نینە.
لەوما نەتەوە خودان بنەمایێن خۆیە، کو پێکدئێتن ژ: زمان، کەلەپوورێ دیرۆکی یێ درێژبووی، میراتێ هەڤپشک، و گرێدان ب هەمان ئەردی ڤە.
د دەمەکێ دا کو ئایین و مەزهەب وان ڕووبارێن ڕۆحی پێکدئینن یێن کو ناسنامەیێ دەولەمەند دکەن و زەنگینی و جۆراوجۆرییێ ددەنێ.
و بێگۆمان پەیوەندییا د ناڤبەرا نەتەوەیا کوردی و ئایینێ ئێزدی دا، پەیوەندییا ڕیشەیی (ئەسلی) یە ب ئێك ژ ڕووبارێن وێ ڤە.
و دەما پەیوەندیدارییا ئایینی دگەل چوارچۆڤەیێ نەتەوەیی دگەهنە هەڤدو، هەردوو ئێک و دو تەمام دکەن، و ڕەهەندێن جۆراوجۆری، فرەیی و زەنگینییا شارستانی ددەنێ.
چونکی ئایین باوەڕی و ئیمانە، و پەیوەندییەکا ڕۆحییە کو مرۆڤی ب باوەڕێن وی ڤە گرێددەت، لێ نەتەوە گرێدانەکا مرۆڤایەتییە، کو دیرۆک، میرات، کەلەپوورێ هەڤپشک، ئەرد و بیرەوەری کۆم دکەت.
ئێکگرتنا نەتەوەیی جوداهییا گرێدانێن ئایینی ژ ناڤ نابه‌ت، به‌لکو بەڕۆڤاژی، ڕەسەناتیا گەلان و جۆراوجۆرییا وان دپارێزت.
ل سەر ڤێ چەندێ، هەر بزاڤه‌ك بۆ بڕينا وان پەیوەندییێن دیرۆکی، زمانی و چاندیی و لێدانا مێخا جوداهییێ د ناڤبەرا پێکهاتەیان دا ل هەرێما کوردستانێ و عێراقێ، ژ ڕوویێ هزری و مرۆڤایەتی ڤە هاتییە رەتکرن، ژ بەر کو ناسنامە ژ وێ مەزنترە کو د جوداهیا ئایینی و باوەڕی دا بێتە تەنگکرن و کێمکرن.