سه‌ما
پارێزگارێ دهۆكێ دێ ل گه‌ل خه‌لكێ كۆمه‌لگه‌ها شاريا كۆم بت و پرسا ناحيه‌بوونێ دێ گوتۆبێژ كه‌ن.
سعود مستۆ، ئێك ژ كه‌سايه‌تيێن كۆمه‌لگه‌ها شاريا بۆ سه‌ما راگه‌هاند، جوگرافيا ئێزديان ل شاريا و هه‌موو ده‌ڤه‌را بۆ ئێزديان يا گرنگه چنكو گرێدايى هه‌بوون و نه‌بوونا وانه، مه‌رجێ سه‌ره‌كى يێ خه‌لكێ شاريا پاراستنا ديموگرافيا ده‌ڤه‌رێ بتن.
ئه‌و كه‌سايه‌تيێ ئێزدى دبێژت: ل ده‌مه‌كێ نێزيك دێ كۆمبوونه‌كا فه‌رمى دناڤبه‌را پارێزگارێ دهۆكێ و مه‌زن و هه‌لبژێر و خه‌لكێ كۆمه‌لگه‌ها شاريا دا ئێته ئه‌نجامدان.
سعود مستۆ راگه‌هاند ژى، چاڤه‌رێ نه كۆمبوونێ ئه‌نجامێن باش دێ هه‌بن خێرا خه‌لكێ كۆمه‌لگه‌ها شاريا تێدا هه‌بت.
ل رێكه‌فتى 30/10/2024ێ، نێچیرڤان بارزانى، سه‌رۆكێ هه‌رێما كوردستانێ فه‌رمانا هه‌رێمى بۆ ب ناحیه‌كرنا شاریا، مسێریك و ته‌ناهى ده‌رخست و هه‌ر ژ وێ رۆژێ ئه‌و فه‌رمان چوو د وارێ بجهئینانێ دا.
ل گۆڕه‌یى سه‌رۆكایه‌تییا هه‌رێما كوردستانێ ب ناحیهبوونا وان هه‌ر سێ كۆمه‌لگه‌هان ل سنورێ پارێزگه‌ها دهۆكێ دێ بته ئه‌گه‌رێ به‌رفره‌هبوون و به‌رده‌وامیدان ب خزمه‌تكاریێن گشتى و پێشكێشكرنا ئاسانكاریێن زێده‌تر یێن كارگێرى بۆ وه‌لاتیێن وان هه‌ر سێ ناوچه‌یان.
پشتى سه‌رۆكێ هه‌رێما كوردستانێ فه‌رمانا ب ناحیهبوونا (تەناھی، مسێریکێ و شاریا) ل سنورێ پارێزگه‌ها دهۆكێ ده‌رخستى، ل رۆژا 14/11/2024ێ، ماجد سەید سالح، جێگرێ پارێزگه‌‌رێ دهۆكێ راگه‌هاند، رێكارێن ناحیهبوونا وان سێ ناوچه‌یان ده‌ستپێكرى یه.
شاريا ل نيسانا سالا 1987ب فه‌رمى بوويه كۆمه‌لگه‌هـ و سه‌ر ب ناحيا فه‌يديێ و قه‌زا سێمێلێ ڤه‌يه.