سه‌ما
په‌يڤدارا فراكسیۆنا پارتى دیموكراتى كوردستان ل په‌رله‌مانێ عیراقێ دبێژت: ڤيان ده‌خيل: هێزەکا دەرەکی هەیە رێ نادەت حکومەتا عیراقێ رێککەفتنا شنگالێ جێبەجێ بکەت.
چارشه‌مبوويێ13ێ تشرینا دووێ 2024ێ، ڤیان ده‌خیل، په‌يڤدارا فراكسیۆنا پارتى دیموكراتى كوردستان ل په‌رله‌مانێ عیراقێ بۆ كوردستان٢٤ێ راگه‌هاند كو، سه‌رۆك بارزانى و سه‌رۆكێ هه‌رێمێ و سه‌رۆك وه‌زیرێ كوردستانێ، هه‌ر و هه‌ر خه‌ما وان یا مه‌زن شنگال و خه‌لكێ شنگالێ و ئێزدیێن شنگالێ و كچ و ژنێن شنگالێ نه كو كه‌فتنه ده‌ستێ داعشێ.
دبێژیت: پشتى9سالان، ره‌وشا شنگالێ وه‌ك خۆیه و خه‌لكێ شنگالێ یێ ڤه‌گه‌ریاى، پرانیا وان هه‌ر ل سه‌ر جادانه، خانى نینن و ئاڤه‌دانكرن ل ده‌ڤه‌رێن وان نینه، ئاسایشا وان نینه، ئه‌گه‌ر پارتى ڤه‌گه‌ریابا شنگالێ، ره‌وشا شنگالێ وه‌ك نهۆ نه‌دبوو كو پشتى خیانه‌تا16ێ ئوكتوبه‌رێ ب سه‌رێ وێ دا هاتى، ئه‌و هێزێن نهۆ ل شنگالێ، دلێ وان بۆ شنگالێ نه‌مایه و ب مه‌ره‌م د ناڤ شنگالێ دانه.
ڤیان ده‌خیل ئاماژه ب وێ چه‌ندێ كر كو، حكومه‌تا هه‌رێما كوردستانێ گه‌له‌ك هه‌ول دان بۆ كو رێككه‌فتنا شنگالێ دگه‌ل به‌غدا بهێته ئیمزاكرن، به‌لێ هه‌تا نهو حكومه‌تا عیراقێ چ به‌شه‌ك ژ وێ رێككه‌فتنێ جێبه‌جێ نه‌كریه، ژ مافێ دامه‌زراندنا 2500 پولیسان كو دڤێت ژ خه‌لكێ شنگالێ بن، هه‌تا نهۆ نیڤا وێ ژمارێ ژى نه‌هاتینه دامه‌زراندن.
دیسان دبێژت: ئه‌وێن ڤه‌گه‌ریاین، پۆشمان بوون ژ نه‌بوونا چ خزمه‌تگۆزاریه‌كێ د ساخله‌مى و په‌روه‌ردێ و لایه‌نێن دى دا، دۆسه‌یا شنگالێ داوی دۆسه‌یا حكومه‌تا عیراقێ یه و گوت: هێزه‌ك هه‌یه رێ ناده‌ت حكومه‌تا عیراقێ ئه‌و رێككه‌فتنا شنگالێ جێبه‌جێ بكه‌ت.
ڤیان ده‌خیل دبێژت: هه‌تا ئه‌و هێزا ده‌ره‌كى ل شنگالێ بت، نكارين چ پرۆژه‌یه‌كى ل شنگالێ جێبه‌جێ بكه‌ین، چونكى ئه‌و رێگریێ ل وان پرۆژان دكه‌ن.
گۆتژى: پێدڤیه بودجه‌یه‌كا باش بۆ ڤه‌گه‌ریانا ئاواره‌یێن شنگالێ بێته ته‌رخانكرن، داكو بكارن ڤه‌گه‌رنه ده‌ڤه‌رێن خۆ.
نه‌هـ سال ب سه‌ر ئۆپه‌راسیونا شنگالێ را ده‌رباز دبن، ئه‌و سۆزا پشتى سێ رۆژان ژ داگیركرنا شنگالێ سه‌رۆك بارزانى دابوو بابه‌شێخێ ئێزدیان، ل به‌ر چاڤێن هه‌موو جیهانێ هاته جێبه‌جێكرن.
ئۆپه‌راسیۆن ب سه‌ركردایه‌تیا راسته‌وخۆ یا سه‌رۆك بارزانى و به‌شداریا پتر ژ 7 هزار و 500 پێشمه‌رگه‌یێن كوردستانێ و هێزێن ئاسمانى یێن هه‌ڤپه‌یمانیا نێڤده‌وله‌تى هاته به‌رێڤه‌برن، د ماوه‌یێ كێمتر ژ 24 ده‌مژمێران دا شنگال هاته رزگاركرن و سه‌رۆك بارزانى سۆزا خۆ جێبه‌جێكر.